Deobar-a kechi anogo asütsü ?

Yisu Khrista asoba bilemtetba anogo December 25 ya ‘Junga yimsüsüba’ ( Good governance) anogo asütsü aser Yisu alima meimchir temenen alangzüktsü asoshi pa kangkidong nung asüba “Good Friday” anogo ya ” Digital India” anogo asütsü süra, Deobar anogo-tem ya kechi anogo ka asütsü bilemdar ta asüngdangtsüsa tang BJP teloki aniba India government-i inyakdagi. Iba amai inyakba ya tangar masü saka India nung aliba Khristan-tem mezüngmeshiba mapa ka asütsü. India temzüng nung India nunger senso ajak nem pei amangnüba yimsü amangtsü aser sayutsü temeten agüja lir. Aji oda, India ya tamangba yimsü ajak nem kasasa akümtsübu agüja benshiba nüchiso lima ka lir. Ajisüaka, BJP government-i Khristan-tem asoshi kanga tongtibang anogotem ajak shiteta yimten sentong agitsü latetba yagi Khristan-tem reshikangshitsü tenzüker asütsü. Küm nung anogo 365 lir aser item anogotem rongnungi Christmas anogo nungang nunga ta ‘ Good Governance Day” amongtsübaji aser Yisu asüba anogo ‘Good Friday’ nungang nunga ta ” Digital India” anogo amongtsübaji kechi tangatetba aser kechi nükjidong nung ayongzük-ar tangatet dang lir. Ibaji Khristan-tem anema ayongzükba tongpang ka asütsü. Iba ama tamangba dak kongshia center sorkari lemtetba sentongtem aija Meghalaya aser Mizoram government-i ola adokbaji ochi aser tangatet yimten ola ka asütsü. Ajisüaka, Nagaland ama Khristan state ta masamasaa jembiba state ka nungi yimten nungia aser arogo tsütsüa kecha ola malibaji tesüngmangtsüka lir. Yimten aser lokti nung telemtetba agidang ola madokba tetezüji ‘hau junger” ta agizükba temaitsü lir. Aji oda, tang tashi Nagaland government aser Nagaland nung arogotemi center sorkari Good Governance Day aser Digital India anogo amongtsü lemtetba anema ola madokba tetezüji, December 25 nü Nagaland nungbo Christmas program masü saka Good Governance day program yanglua amongtsü aser Good Friday nunga Yisu asüba anogomong sentong masü saka Digital India anogomong sentong tulu yanglua amongtsü. Item sentongtemji center government sentong asünungji, talisa government mapa inyakertembo, kangtepa oa adentsü. Atangji, yimten nung ochishia aser jungjunga yimsü asütsübaji kanga tongtibang , anungji Good Governance Day monga yimsüsür aser ketdangsertem adenshia ajungshitepa amongtsüla, saka kechiba Christmas anogo nungang iba ama sentongji agitsü shimtet ? Ibai Digital putu, anungji Digital India anogomong monga tangatetba nübortem nem tangatetba agüja amongtsübajia tongtibang saka kechiba Khristan-tem temulung raksaa lumia amongba anogo nungang iba anogoji amongtsü shimtet ? Shitakba agibo, Garo, Khasi aser Mizo nungbai ola madokdang tamasa Naga nungbai tama adoktsüla. Shitakba agi, Meghalaya chief minister dang nungibo Nagaland chief minister-i tama ola adoktsüla. Aji oda, shitakba Nagaland nung Naga nunger BJP telok nung dena alirtem ya Khristan purtem süra tang yabo ola kabo adoker alitsüla. Tang yabo BJP teloki aniba center government-i Nagaland nung Naga nunger ajak Hindu kümra sen agir magima  agütsütsü aser idangjibo kecha meinyakyonga ajak takar akümtsü ta nangzük nungbo Naga nunger Khristan telok telongjem nung tulutibai anir nütsüng ajak kecha menungnangi yimsü melentsü südi. Nagaland government akümtsü asoshi Naga nunger yimten lenirtem dak tangatetba ka dang lir, ibaji center nung kechi teloki akümba government südir, iba telok nungji adentsüla, kechiyong iba amaji asünung dang sen peria angutsü. Aji oda, Nagaland nung yimten yimsüsür aser tamangertem ajak ya Yisu masü sen külemer dang kümogo. Asenoki metettsüba kaji Nagaland state ya India nung ali tashi la tangutsü timbo lemzüktsütsü. Tanüngbajibo teinyakertemi koma jembitetter aser inyaktetter, iba dakji aket. Ajisüaka, asenok iba amaisa alinungbo, ano yakta India nung Deobar anogo ya deobar anogo masü saka tongtibang yimten anogomong ka asütsüsa sangdongtsüa akok ! Idangjia asenokibo ola madoktsü, kechiyong center sorkari lemtetba anema ola adokra, sen peria  magütsütsü ! Ibaji asenok tangatetba ! Asenokbo sen ngura ojang !