Deobar anogo tatidang magitsüla: NJCF

Dimapur, Luchii (December) 7 (TYO): Chief Secretary indang office ajanga December 9 nü Social welfare department aser December 16, 2018 nü Taxes department indang tatidangtem agitsü osang metetdaktsüba atema Nagaland Joint Christian Forum (NJCF)-i ashishiteper.
Tatidang agitsüba anogotemji Centre sorkari lateter süra Nagaland sorkari parnok dak tashi mali ta tatemtsü tajung agütsütsü akok, saka Deobar anogo ya Khristantem külema amungba anogo lir. Anungji iba anogo nung tatidang agitsü lemtetbaji tatidang agütsürtem indang tamangba yimsü temeten mezüngmeshiba aser Deobar anogo mapa inyakba anogo ta sensatsüba inyakyim lir, ta NJCF-i metetdaktsü.
Arogoi Deobar anogo meshiteta ayutsü atema jembia arur saka sorkari metetsümonga Deobar anogotem tatidang agitsü lemtetba ya magizüker aser ya ajanga arogo temulung yirutsüogo. Nagaland Joint Christian Forum-i Chief Secretary nü Deobar anogo masü saka tanga anogotem tatidangtem agitsü melenshitsü mepishir. Iba ya tatishitsü tajung ka ama züngshitsüla aser tang nungi asenoki arogo aser temeshi anogotem akhümtsübutsü angazüktsüla, ta NJCF President-i Rev. Dr. Zelhou Keyho-i ashi.