Department ana-asem nung inyakertemi June 30 tashi nung department ka dang shimtsüla : Yitachu

Kohima, June 8 (TYO) : School Education Department nung mapa inyakertem kar department 2-3 nung inyaka lira, June 30, 2016 tashi nung department ka nung inyaktsü tetuyuba agütsür, ta School Education & SCERT Minister, Yitachu-i tanü metetdaktsü.
Directorate of School Education-i Ura Academy Hall, Kohima nung Physical Education Teachers (PETs) atema anogo asemnü ‘training cum conference’ tenzüktsüdang Yitachu-i iba osang metetdaktsü.
“June 30, 2016 sülenbo taochi sayuba mapang matsülangtsü. School Education toktsür tanga department ana-asem nung inyakertem dang department ka nung dang inyaktsü nenshia metetdaktsür. Taochi sayuba mapang tembangba sülen, tashi mangartem service nungi anentsütsü aser parnok anema ozüng alema inyakba ken o tem benoktsü, kechiyong iba inyakyim ajanga zünger mapa mongui aliba lanurtem aika timtemdaktsür” ta School Education & SCERT Minister-isa metetdaktsü.
Physical Education indang onük jembidang Yitachu-i ashiba agi, “meimchir ka temang nung tashitaittiba shilemji tekolok lir aser nisung ka tekolok junga alitsüla, saka temang anema aliba aser tashi itta aliba ajanga dang tekolok junga yutettsü. Ibaji Physical Education ajanga angutsü.”
“Education system nung Physical Education ji kanga dang tongtipang shilem ka lir aser sen mesüra rongsen dang nungi temang anema alibajisa tajungtiba, saka Naga nungeri temang anema ayutsü atema masü saka rongsen ang tesapuba. Anema alirtem aliba loktiliba ka kümdaktsütsü atema tila asüdang nungi Physical Education tongti süa angazükdaktsütsüla. Anungji, school temi physical education nung shilem ka ama saisapong kabosa dendaktsütsüla” ta Yitachu-i ayongzük.
Nagaland kübok school aika nung PE tesayurtem mali aser kar nungbo PE tesayur ana-asem lir. Anungji, tesayurtem mapa lemzüka aliba reprangshimba sülen PE tesayurtem maliba school temi tesayurtem yoktsü aser PE tesayurtemia parnok temeket nung aliba school tem nung mapa inyaktsü atema department den tebilemba lemsateptsüla, ta Minister-isa shisem.
Yitachu-isa departmental cadre review indang olen ka jembidang, “department sasep nung mangatettep aika aliba ajanga iba mapa nung tetsükdaktsü ajurua lir, anungji cadre review junga inyaktettsü aser nüngdakba ama temelenshi bener arutsü atema department sasep nung inyakertem ajaki department nem tetsükdaktsü melii inyaksangshitettsü atema meinprong masütsü mepishir,” ta ashi.
Paisa, Department sasep nung kongsang balala ajak atema Additional Director ka alitsüla aser iba nung Physical Education, Planning, Language aser Hindi densema lir, ta ashi.
Iba sentong agiba nüngtem nung Yiatchu-i Physical Education Teachers aser Nagaland nung Classes 6-10 kaketshirtem atema Handbook ka sayatsü.
Iba kaket ya All Nagaland Physical Education Teachers Association (ANPETA) President, Vitsolie Keyho-i adokba lir.
Sentong nung mendenji ANPETA President, Vitsolie Keyho liasü, Mesehol-i temoatsü meshia sarasadem, Deputy Director (PE), T Lipok Jamir-i tesentepertem pela agizük aser Venolie Medon-i anküp tepela o jembi. Sentong nungsa, Additional Director, School Education, Pollem Tep-ia tayongzüba o jembi aser GHSS Seikhazou kaketshirtemi ken ka aten.
Anogo asemnü ”training cum conference’ nung PET ajak dang PE Handbook aser Sepak Takraw sayutsü aser ano practical session & discussion mapangtem agitsü. Iba sentong ya June 10, 2016 nü tembangtsü.