Department of H&FW ajanga COVID vaccine atema metetdaktsür

Dimapur, Chiteni/July 22 (TYO): Nüburtem teyari aser amalitep ajanga India nung COVID-19 vaccine dose crore ana agütsüba July 15, 2022 nü benjongogo, ta Department of Health & Family Welfare ajanga sangdong ka nung ashi.

Nagaland nunga tang tashinung COVID-19 vaccine dose lakh 16.90 dak tema agütsür lir. Iba mozü agitsü temsüa alirtem rongnung 1st Dose agir alir shilem 58.8, 2nd Dose agir alir shilem 46.8 aser Precaution Dose agir alir nisung 42,000 dak tema lir.

State nung ano tawa ka nungi COVID-19 positivity rate tali akumba ajanga nüburtem dang first, second aser precaution dose ya tekeratiba nung Government Covid Vaccination Centers (CVCs) nung agitsü ayongzüker, ta Department sangdong ajanga ashi.

July 20, 2022 tashinung Nagaland nung nisung lakh 1.75 dak tema 2nd dose agitsü/mapang süyir liasü aser Precaution Dose agitsü temsüa alir nisung lakh 5.6 dak tema liasü.

Iba mozü agitsü temsüa alirtem nem mozü agütsütsü asoshi Government of India ajanga sentong tasen – Azadi Mahotsav sangdongogo, koba ajanga Government CVCs ajak nung precaution dose angati anogo 75 (September 30 tashi) aser Har Ghar Dastak ya July 31, 2022 tashi agütsütsü.

Linük aser state nung COVID-19 cases timba akumer asünung, iba tashidak prokshiba nungi jenbua alitsü mechi nüburtemi vaccine agitsü, mask inoktsü, tena shidoktsü aser social distancing yimya amshitsü nenshia metetdaktsür, ta Directorate of Health & Family Welfare ajangasa ashi.