Department of Labour ajanga kisü-jensür dang metetdaktsür

Dimapur, Aami/June 21 (TYO): Tang tashidak wara agi bener arutsüba tensa aser maneni lockdown benokba ajanga anogoshi aayanger, talisa kisü-jensür linük tesem ajunga len prokshia lir, ta Department of Labour ajanga ashi. Iba yongji mapa inyaker aayangdak mali, mapa inyaker aser parnok kibong tem tim atemer.
Anungji iba ama mapa inyaker aser kibongtem yaritsü mechi Central sorkari State aser Union Territories nung sorkar nem nungloktsü.
Yamaji Central sorkar totuyuba nung ajemdaker Nagaland sorkari Labour Department kübok tenüng züluoka aliba kisü-jensür (Building and Other Construction Workers) ajak indang bank account tem nung sen 2,000 inoktsütsü melaogo, ta sangdong ajanga ashi.
Tanü tashinung Labour Department nung iba ama mapa inyaker nisung 30,797 tenüng züluoka lir. Ajisüaka Department ajanga teyari sen ya bank account active alir nem dang transfer sütsütettsü. Anungji kisü-jensüba mapa inyaker account active mesüi alir dang active südaktsütsü metetdaktsü, aji asünung dang timtem majurui iba teyari ya agütsütettsü, ta ashi.
Iba sen ya Cess Fund nungi inoktsütsü. Department of Labour ajanga tenüng züluoka aliba nisungtem ajak indang technical mapatem inyaktepogo aser DBT ajanga senotsü teyari takok ngua agütsü tenzükogo, ta sangdong ajanga ashi.