Department-temi RTI telangzüba magütsür: NPRAAF

Kohima, Jan. 04 (TYO): Nagaland nung department aikati RTI ozüng ajanga temetetnüba asüngdangaka menua telangzüba magütsür, anungji Center nung ministry balala dangi zülutsüsa akümtsü ta Nagaland Public Rights Awareness and Action Forum (NPRAAF) teloki metetdaktsüogo.
Iba telok yagi November 04, 2016 anogo nung Land Resource, Rural Development, Health & Family Welfare, Power aser School Education department-tem nem parnok department shia kübok inyakba maparen kar indang temetetnüba metetnüa RTI application agütsü saka telangzüba department ka nungia mangu, anungji December 21, 2016 nü office ajak tonga oagi telangzüba menua magütsüba kuliji asüngdanga senzü, ta NPRAAF lenirtemisa metetdaktsü.
Iba anogo nung School education Director aser Power department nung Chief Engineer nati menuba atema taidok meshi aser mapang meshilok saka Rural Development Department aser Land Resource department na nungibo kecha telangzüba mali asü ta parnokisa ashi.
Ano, Health & Family Welfare Directorate nungi NPRAAF dangi yokba osang ka nung ashiba agi, parnoki agütsüba RTI application-ji Nov 10, 2016 anogo nung State Program Officer aser PIO (NHM) aser Program Officer aser PIO (RCH) na dangi yokadoker liasü. Ajisüaka, item PIO-tem jagi telangzüba magütsüba kuli meshia NPRAAF-i metetdakja lir.
RTI ajanga nisung kari langka metetnüa application agütsür külen mapang shitak nung telangzüba magütsütetra, iba telangzüba magütsü tashi temenuba anogo shia sen Rs.250 senchi agitsü aser iba senjibo department nung PIO ( Public Information Officer) ita sen nungi katitsüsa RTI ozüng nung lateta lir.
NPRAAF-isa ashiba agi, parnok November 4, 2016 nü anüngdang 12:00 ako nung Rural Development (RD) Directorate nung parnok RTI application agütsüi aodang office nung inyaker shinga mali asü, anungji RTI application-ji office Peon-i agizük aser ano December 21, 2016 nüa kasa osang agiteper telangzüba abeni aodang RD office nung anüngdang shinga mali asü.
NPRAAF-i RD department dang metetnüa asüngdangbaji Ministry of Rural Development Govt. of India ajanga July nung sen 5356.56 Lakhs (Rupees fifty three crore fifty six Lakh and six thousand only) yokba sen amshiba indang liasü. Iba senji 2014-15 küm asoshi MGNREGA mapa inyaktsü yokba teyari (1st quarter) liasü ta parnokisa metetdaktsü.
Ano, NPRAAF teloki Land Resource Department danga Ministry of Rural Department Govt. of India nungi Nagaland nem 2015-16 küm atema IWMP sentong asoshi yokba sen Rs 27.00 crore amshiba indang liasü.
NPRAAF teloki agütsüba RTI application nung item department-tem nung tsümar kari contract aser supply mapa agizüka inyakba indang metetnüa asüngdanga lir.
Department aika nung tsümartemi mapa meinyak ser yimsüsür aser tulurtem den angatetteper sen agizüka agiba otsü lir , iba jagi asen lima nung mapa inyakmong kecha mangur, itemji tatem tashi bushitsü ta NPRAAF telokisa metetdaktsüogo.