Dept. of Cooperative societies-i Ritse den tepila sentong agi

September 27, 2019 nü Hotel Japfü, Kohima nung Dept. of Cooperative societies-i ayongzükba tepila sentong nung mapa nungi anisüngzüker RCS, Wepe Ritse-i jembiba noksa nung angur.

Kohima, Sept. 27 (TYO): September 27, 2019 nü Hotel Japfü, Kohima nung Registrar of Cooperative Societies office Kohima nung ketdangsertem aser staff temi mapa nungi anisüngzüker RCS Nagaland, Wepe Ritse den tepila sentong tajung ka agiogo, ta ketdangsertem osang ka ajanga metetdaktsü.
Iba sentong nung jembidang Agriculture & Cooperation Minister, G. Kaito Aye-i RCS Ritse-i pa tenzükba wadang nung aliba küm 35 piyong nüburtem kanga nendaka tenzükba atema pelaba lemsatep.
Paisa department dang mapa nungi anisüngzüker ketdangseri department ajungkettsütsü, talisa aluyimertem ajungkettsütsü atema mapa tajung inyakbaji maneni ajaki benshitsü ayongzük.
Paisa ketdangsertem aser staff tem dang nüngdakbapurtem yaritsü aser department ajungkettsütsü atema amalitepa inyaktsü ayongzük.
Tepila o jembidang Wepe Ritse-i, department atema pa indang mangdang rongnung kaji amalitepa inyaktsü aser state nung kanga takok anguba cooperative societies ka asütsü liasü, ta metetdaktsü.
Yimtsüng 70 dak tema nung ‘one village, one cooperative society’ inyakyim tenzük aser district ajak nung ‘One cooperation’ ayongzüka agiogo, aser ibaji tongti cooperative organizations tajungba akümtsü, state revenues ajungtsü aser state nung zünger mapa mangur lanurtem nem mapa maongka agütsütsü atema lir, ta ashi.
Paisa pa tenzükba wadang tepiyong department nung ketdangsertem aser staff temi pa nungita amalitepa inyakba atema pelaba lemsatep.
Paisa ketdangsertem aser staff tem dang kin tebendang kecha makai nübur ajak tajungtiba nung tenzüktsü aser kibong ka ama longjemer inyaktsü ayongzük.
Kasa sentong nung tepila o jembirtemji District balala nungi züngsemtem aser Sub- division officers, Nagaland State Cooperative union (NSCU), Principal, Cooperative Training Centre (CTC), Medziphema, Nagaland State Cooperative Bank Ltd. (NStCB), Nagaland State Marketing & Consumer’s Cooperative Federation Ltd (MARCOFED), Nagaland State Dairy Cooperative Federation Ltd (WEAFED), Nagaland State Entrepreneurs Association, Apex weavers & Artisans Cooperation federation, Thrift & Credit Cooperative federation, NSCOA, NSCFSA, ministerial Staffs aser Grade IV staff tem liasü. RCS Staff temi tepila ken ka aten, B. Bumo Khiamniungan, Addl. RCS-i lokti pelaa agizükba o jembi aser Imsunungsang, ARCS-i sarasadema liasü.
ARCS, Bokato Hesso-i mapa nungi anisüngzüker indang tongmelang agi metetdaktsü. Iba sentong ya Commissioner & Secretary, Cooperation Department L. Akato Sema, IAS leniba nung agia liasü.