Dept. of T&A mapa nungi anisüngzüker den tebila sentong agi

Dimapur, Luroi/August 31 (TYO): Department of Treasuries & Account, Nagaland ajanga Luroi/August 31, 2018 nü Director, Daso Paphino aser Assistant Director, Neivicha Angami na den DTA Conference hall, Kohima nung tebila sentong (farewell) ka agiogo.
Iba sentong nung Department tenüng nung jembiba mapang, ketdangsür anadi bendanga agütsür inyakba ajanga Department renlokogo aser parnoki mapa tajung inyakba teti bilemtettsü, ta Principal Director, K. Tiayanger Tzudir-i ashi.
Iba sentong nung tebila o jembiba mapang, State nung nüburtemi ariabilemba aser anepaluba ajanga mapa tajungtiba nung inyaktsü ajungmeso, ta Director menden nungi anisüngzüker, Daso Paphino-i ashi. Paisa külem tenzükertem dang district office balala nung oa nüburtem ajurutsü maongka teti agiang, ta ajungshi. Iba ajanga parnoki tajungba inyaktsü asoshi tashi tasen angur aser ajungmesodaktsür, ta paisa shisem.
Department nung mapa tilaka dang süaka kanga kümdanga aser bendanga agüja inyaktsü tongtibang lir, ta Daso Paphino-isa ashi.
“Nisung ka kisüngi meinyaktettsü aser nisung kati mapa kar nung takok ngunüra telok ka ama külemi inyaktsüla,” ta paisa ashi. Maneni paisa Department nung staff tem dang pei tata mapa nung bendanga agütsür nüburtem asoshi tajungtiba nung inyaka temoatsü angutsü ajungshia liasü.
Iba sentong ya Treasuries and Accounts Director, R.N. Yanthan-i ketdangsüa agi aser Jt. Director, Khevito Sema-i tepela o jembia liasü.