Depts. longjemer inyaktsüla: Temjen Toy

Kohima, Rongchii/April 02 (TYO): Mongolbarnü Secretariat Conference nung ita shia amenba AHODs aser HODs senden menogo, ta ketdangsertem osang ka ajanga metetdaktsü.
Iba senden nung jembidang Nagaland Chief Secretary, Temjen Toy-i, asenoki lenmang bushitsü melen tatemtsü ang yanglur aser tai puteper, ta ashi.
“Inyakyim teladak asutsü, temelenshi adokdaktsütsü aser yimsüsübaren tajung asutsü nüngdaker,” ta Temjen Toy-i ashi.
State nung junga yimsüsübaren alitsüji nija shiai melungteter inyakba dak keta lir, ta pai ashi.
Health, RD aser Social Welfare departments longjemer inyakba atishia Temjen Toy-i ketdangsertem dang, alima tesem ajungalen nisungtemi departments balala mesüra agency balala tsüngda longjemer inyaker, ajisüaka Nagaland nungbo departments timbakati pei department nung ang rangloker inyaker, ta ashi.
Senden nungsa, yaküm state sorkari ‘Plastic Free Nagaland’ sangdongba sülen Secretariat complex den department kar aser office temi plastic bottle tzü mamshii water dispenser dang amshiba indang metetdaktsü.
Iba dak sendakba nung department balala dang Plastic Free Nagaland mapatong atema peipei department-i inyaka aruba osangtem aser iba onük nung tebilembatem home department nem agüjang, ta metetdaktsü.
Senden nung ketdangsertemi, jana bendanga bendener indokba maparen ya office nung dang masü saka kibong ajunga nung benshitsüla, aser village councils danga peipei yimtsüng nung plastic free zones sangdongtsü tuyutsüla, ta bangjemogo. Iba dak alia sorkar office tem nung email ajanga osangtem tongtepratepba ajanga shidi (paper) ajema amshitsü bangjem.
Senden nung sorkar ketdangsertem aser departments-i parnoki tenzükba nüburtem den sendakteptsü atema o lemtep, aser iba dak sendakba nung Agriculture aser allied departments-i mapang shia IPR Department ajanga osangkakettem nung Public Service Announcements (PSAs) agütsütsü melungogo.
DGP Nagaland, T.J. Longkumer, IPS-i, police units ajak plastic free zones ta sangdongtsü, ta metetdaktsü. Paisa Police-i traffic atema telatetba kar metetdaktsütsü, koba ajanga Kohima nung traffic tebilemtsü ajema akümtsü, anungji ketdangsertem nem peipei department nung item telatetba metetdaktsüner, ta ashi.
Senden nungsa sorkar office aser sentong balala nung nübo ajema aruba tebilemtsü onük nung o lemtep, yamaji tang nungibo AHODs aser HODs-i tashi manger ketdangser aser staff tem nem temerenshi tulu agütsütsü, ta bangjemogo.
Senden nung Chief Electoral Officer, Abhijit Sinha-i Model Code of Conduct (MCC) indang power point presentation agütsü aser Voter Verifiable Paper Audit Trail (VVPAT) amshiyim sayua liasü.