Despicable Me, Producer-i Super Mario Movie yanglutsü

Tsüklai 1, 2018 (Agencies): Japan indang Nintendo puri Yangtepnü ashiba agi, parnoki video game character Super Mario indang movie ka “Despicable Me” series yangluba US studio pur den sentepa yanglutsü. “Super Mario Bros” aser “Donkey Kong” game yanglusang Shigeru Miyamoto, Illumination Entertainment pur den Mario anime produce asütsüba atema inyaka arudar.
“Nisungtemi kü dang game yangluba aser movie yangluba ya kasa dang, ta shia aruogo aser nai game yanglutetra movie-a yanglutettsü, ta shiogo. Ajisüaka iba ana ya khenyongi balala lir, ta Miyamoto-i Tokyo nung osangbenertem dang ashi. Pai taoba mapang nung short movie karbo direct süogo aser pai ashiba agi, film yanglutsüba atema iba wadang nung mongintem nüngdaker aser Meledandri ya experience akaba producer ka lir.
Taoba mapang nung Meledandri-i “Despicable Me” series aser “The Secret Life of Pets” movie direct süogo aser kanga takok tajung nguogo.
“Ni pa den maparen inyaktepa liasü, saka küna külemi inyaktsü asoshi mulungtepba sülen küm ana lirang iba osang ya sangdonger,” ta pai ashi.
Miyamoto-i ashiba agi, pa aser Meledandri na maparen balala inyak tenzükogo, saka film sayatsüba anogobo tang tashi melemtet. Paisa ashiba agi, parnoki film ya junga meyanglutetra mesayatsü. “Künati film indang script dak sendakba nung aiben sensaksemogo aser küna tsüngda inyakyim tejakleni odar,” ta paisa ashi.
Iba film ya yangluzükba sülen Universal Pictures puri lemshitsü, ta Miyamoto-isa ashi.
Nintendo puri ashiba agi, parnoki smartphones atema Mario Kart title tasen ka taküm Rongchii (April) sayatsü asoshi sentong lir.
Super Mario character dak ajemdaker 1993 küm yangluba Hollywood live-action film ka lir, saka iba film ya kangabo takok tajung mangu.