Dev Patel Oscar nung Nominate süogo

February 17, 2017 (Agencies): Lion’ film nung shilem agiba atema best supporting actor jenjang asoshi tang 89buba Academy Awards nung nominate süa alisang, actor Dev Patel-i ashiba agi, hopta ka sülen agitsü aliba sentong indang bilemdang mapang shia temulung ila bilemer.
Lion film ya shidakba tatalokba otsü nung ajemdaker yangluba film ka lir. Iba film ya India nunger küm 5 teburchanu Saroo Brierley indang otsü lir. Iba otsü nung pa kidang nungi kilometer meyirjang aika pilar Kolkata yimdong nung samaba otsü ka lir. Pa Australia nunger kibong kati adopt masü tsüngda timtem aika ajurua ali. Küm 25 lir külen pa par kibong bushitsü asoshi aposoba otsü ka lir.
Küm 26 tain Dev-i, Garth Davis-i direct asüba movie ya ajaki meima agizükba atema kanga pelar. Iba film ajanga nisung aika tajungleni melenshiogo, ta ashiba osangbenertemi metetdaktsü.
“Ternemshitsü aikabo mali. Joko film ya Tsüngrem teka nung lir, saka iba sentong indang bilemdangdang temulung kanga tata bilemer. Iba film screen asüba sülen tetsür ka kü dangi aru. Lai ashiba agi, la tanur ka adopt sünür saka temulung muluteti liasü. Lion film reprangba sülen la mulung melenshiba kü den lemsatep,” ta Dev-i ashi.
February 26 nü iba sentong nung tetsü pa den Anita Patel dena oa adentsü renema lir.