‘Development of Experts’ training tembanga agiogo

Kohima, Aami/June 28 (TYO): Tanü agi tanünübuba Conference Hall, Directorate of Industries & Commerce, Kohima nung Industries & Commerce-i Agricultural & Processed Food Products Export Development Authority (APEDA) den senteper ayongzükba ‘Development of Experts in Nagaland’ training tembanga agiogo, ta ketdangsertem osang ka ajanga metetdaktsü.
Iba training nung shilem agia adenertemji Agri aser Allied Govt. department balala nungi ketdangsertem liasü.
Iba training ayongzükba tongti nükjidongji asen lima nung adokba/züsentetbatem state adener tanglena yoktettsüsa line departments tsüngda amalitepa inyakba den aluyimertem aser entrepreneurs ajungshitsü atema liasü. State nung akoktsüsa tashi aika liaka tangaleni ayoktsüsa mezüsenteter, ibayongji mongintem adokdaktsütsü atema dept-i iba training ya ayongzükogo.
Iba training nung shilem agirtemji sorkar departments- Industries & Commerce, Agri, Horti, Veterinary & Animal Husbandry, Fisheries & Aquatic Resources, Land Resources, Sericulture, Nagaland Honey Mission aser Nagaland Bio Resources Mission nungi züngsemtem liasü.
Training nung shisalen sayurtemji Assistant General Manager, APEDA, Guwahati, Sunita Rai, Plant Protection Officer, Central Institute of Pest Management Centre, Dimapur, Mukesh Babu aser Financial Education Trainer, SEBI, Chenio Lotha nunger liasü.
Tanü tatembangbuba sentong nung anküp o jembidang Joint Director, Industries & Commerce, T. Moawati-i shisalen sayurtem aser shilem agir ajaki iba sentong nung amalitepa shilem agiba atema pelaba metetdaktsü.
Paisa shilem agirtem dang tarutsü nunga item ama training nung kanga nendaka adentsü aser tang angazükbatemji mapa küma inyaktsü ayongzük.