DFL: P. Vizheto FC-i kokog; FC Alianza & Chanan FC draw asü

Dimapur, Rongjui/September 29 (TYO): Dimapur Football League tanü asaya mezüngbuba A1 Powerplay aser P. Vizheto FC na asayaa liasü, koba P. Vizheto FC-i goal 3-1 agi akok. Asaya nung mezüngbuba goal P. Vizheto FC nungi asayar Kakhevi (10)-i minute 14buba nung idaktsü aser iba sülen A1 Powerplay pur atema goal ka ya Yhonshalo (9)-i minute 42buba nung idaktsü. Maneni asaya nung P. Vizheto pur atema tanungba goal ana ya Akum-i minute 55 aser 68buba nung idakja parnoki asaya akok.
Asaya nung P. Vizheto nungi asayar Akum, Tokugha aser A1 Powerplay nungi asayar Tingnyen nunger nem yellow card kaka agüja liasü.
Tanü asaya tanabuba FC Alianza aser Chanan FC na tsüngda asayaa liasü. Asaya tatem tashi nung telok anapronglai goal kaka dang agütsüba sülen asaya draw nung tembang. Asaya nung mezüngbuba goal Chanan FC nungi asayar Crispin (17)-i minute 2buba nung idaktsü aser iba sülen Alianza nungi asayar Laiwang (10)-i minute 14buba nung par telok asoshi goal ka agüja asaya goal kasasa nung tembang.
Asaya metenzük tsüngda sentong tatsüka agiba mapang tetushi tesemdanger Er. Kitoshe Aye, EE, PHED, Zunheboto Division-i asayartem ajungshia liasü. “tanü asaya nükjidongji goal idaktsütsüba atema dang masü ta ni amanger. Nenok practice asüba mapang, tejashi, tepela ajak ajangshia aruru alitsü saka item tia tensa ajanga nenok iba jenjang tongtetogo aser maneni iba ajanga nenoki tanü nema tanga nenok sempet sayur, ta pai ashi.
Maneni paisa, “nenok tang lanur kaka dang lir aser asüng tia tensa ajak ajangshia aotsü, saka na asayar tajung ka akümtsü asoshi koda meranga inyak ibaji nenoki kodanga mamatsüla. Kasaji nenoki taküm angatettsüla, alitsüla aser taküm ya challenge ka ama agitsüla. Taküm nung nenoki nükjidong yur aliba dak rangloker inyakang,” ta ashi.
“Taküm nung libaliro azüokang. Asaya nung referee temi asaya azüoker, kasaji nenok taküm nükjidong tongtettsü atema liba liro azüokang,” ta Er. Kitoshe-isa ashi.