DFL: P. Vizheto FC-i takok angu

Dimapur, Mongputeni/October 6 (TYO): DDSC Stadium nung Naga United Football Club-i ayongzükba, Dimapur Football League asayamung Mongputeni/Oct. 6, 2018 nü mezüng asaya nung P. Vizheto FC teloki United V&S madak goal 3-0 agi takok nguogo.
P. Vizheto nungi asayar Kakhevi-i minute 33 aser 70 buba nung par telok atema goal ana idakja liasü.
Lemon break sülen asaya tenzüker minute 52buba nung Vizetho FC nungi asayar Inito-i goal tasembuba idaktsü. P. Vizheto FC nungi asayar Kakhevi nem ‘Man of the Match’ sempet aguja liasü.
Kasa asayamung tanabuba asaya tanga ka nung Dorian’s Society aser FC Alianza na tsüngda goal ka danga meyoktetti asaya draw nung tembang. Iba asaya nung FC Alianza nungi asayar Homuka nem ‘Man of the Match’ sempet agütsü.
Küptoknü/Satuarday asayamung nung O. Elhibemo Yanthan tetushi tesemdanger ama jaoka liasü.
Sentong nung Elhibemo-i o jembiba mapang, asayartem dang ajemalua, saisaponger ka dak aketba sempet aser jakla tajung amshia asayatsü asoshi tajungshiba agütsü.
Football asayaji longjema asayaba saisapong ka ta asüba nung ajemdaker, iba asayamung ajanga lokti balala longjemdaktsütsüla ta, Elhibemo-i tayongzükba agütsü.
Paisa, northeast tesem nung football asayar timbaka aso tatsü aliba indang shia liasü, saka international player rongnung aso tatsütemi sempet tajung amshia asayaba ajanga nüngtugu akümba atishia, pei aso atsüba nung mesasatsü atema tajungshiba agütsü.
Nagaland nung football asayatsü jangrar lanurtem nem sabang agüja aser iba asayamung ayongzükba atema Elhibemo-i Naga United FC nem tenüngsang agüja liasü.