DFL Trophy aser Club jersey Sangtennü sayaogo

Dimapur, Rongjui/September 5 (TYO): Rongjui/Sept 5 nü Tourist Lodge Dimapur nung Dimapur Football League trophy sayaba den club tem indang jersey dena sayaogo.
Trophy aser jersey ya asayamung ayongertem, asayamung nung shilem agiba club 8 aser District Football Association aser Dimapur District Football Referee Association senden akaba mapang sayaa liasü.
Iba senden nung DFL Convenor, Shiyeto Wotsa-i league indang temzüng ozüngtem club züngsemtem dang rasaa ashi aser asayamung ayongertemi football aser asayartem ajungkettsü asoshi takok tashi inyakdar, ta ashi. Paisa club tem ajak dang Rongjui/Sept 14 nü asayamung lapokba sentong nung uniform semer arua adentsü asoshi mepeshi. Asayamung lapokba sentong ya Rongjui/Sept 14 nü DDSC Stadium nung 1:00 ako nungi tenzüktsü, kong Higher & Technical Education minister Temjen Imna Along Longkumer tetushi tesemdanger asütsü.
Shiyeto-isa, asayamung nung jurila sempet trok; Best goalkeeper, midfielder, defender, highest scorer, young emergent payer aser man of the tournament agütsütsü sangdong.
Tanü senden nung DDFA Vice President, Tsenthungo Lotha-i, DFL ya convenor ama Shiyeto lenisüba kübok toktsüogo, ta ashi. Paisa, DFL ya tarutsü asayartem atema lir ta shia asayamung nung shilem agiba telok ajak dang asayar yimya tajungtiba benshia DFL jenjang ajungkettsü ajungshi.
DDFRA tir, Shiyito-i asayamung mapang club ajaki teka amtepa inyaktsü asoshi mepeshi. Paisa asayamung indang by-laws lemtsü.