DG-i Kohima Lions Club semdang

Dimapur, May 28: Deobarnü Lion Roman Bordoloi-i Lions Club of Kohima (LCK) semdang. Pa ya Lions Club International of District 322D indang District Governor lir.
Pai LCK semdangba tenüng nung tanü Ura Hotel indang Conference Hall nung sentong ka ayongzüka agi.
Sentong nung Lion Roman Bordoloi-i o jembidang, pai Kohima semdangba atema pelaba ashiba den Lions Club International-i meimchir atema mapatong balala inyakba indang osang metetdaktsü.
Lions Club International-i tenzükba “Diabetes Awareness” project indang ashidang Lion Bordoloi-i, “World Health Organization-i alima nung nisung million 420 tema dak diabetes keta lir ta asadangtetba atema Lions Club International-i Diabetes Awareness indang maparen tenzük” ta ashi.
Iba ya alima nung wara ka ama lir aser 2040 tashi nungbo nisung million 642 den teimba dak atongtsü. Anungji, züngsemtemi iba awareness campaign nung shilem agitsüla, ta paisa ayongzük.
Lion Bordoloi-isa Lions Club of Kohima (LCK) dang Club nung züngsem tasentem anioktsü atema ayongzük.
LCK President Lion Tali Jamir-i District Governor pela agizüka o jembidang, Club-i inyaka aruba osangtem metetdaktsü aser sangküm Lionistic Year – 2017-18 nung mapatong tasentem inyaktsü ta ashi.
LCK Treasurer, Lion Talitemsu Jamir-ia District Governor dang club indang senotsü osang metetdaktsü aser Lion Aroba, mezüng Vice President-i anküp tepela o jembi.
Iba sentong nung Club züngsemtem den Lion Lalita R Khadaria, Secretary, Dimapur Blue Vanda-a aden.