DGC Principal, Kavili Jakhalu den tepila sentong agi

Dimapur, October 01 (TYO): Sept. 30, 2019 nü Dimapur Govt. College nung College-i mapa nungi anisüngzüker Principal, Kavili Jakhalu den tepila sentong ka ayongzüka agiogo, ta ketdangsertem osang ka ajanga metetdaktsü.
Iba sentong ya Asst. Professor in Economics, Dr Vitsosie Vupru leniba nung agi.
Sentong tenzüka DGC kaketshirtemi ken ka atenba sülen tepila o jembirtemji VP DGC, Alemla, Dr Maongsangba-i DGCTA tenüng nung, Kezhaleu Hesso-i HODs tenüng nung, Ashok-i ministerial staff tem tenüng nung, Khrienuo-i Deptt of Political Science tenüng nung, Viketo-i DGC Students Council tenüng nung jembi aser Mithu Lkr-ia tepila o jembia liasü.
O jembirtemi Jakhalu ya Higher Education tsütsü kanga meranga inyaker ka liasü, aser la tenzükba mapang piyong lai department menden balala nung tajung aika inyakogo, ta ashi.
Parnokisa, la ya Administrator tajung ka dang masü saka la dak tasütait tanela aser temelungjang tesadok liasü, ta ashi.
Tepila o jembidang Kavili Jakhalu-i la DGC nung inyakba mapang piyong tesayurtem aser staff temi la nungitba atema pelaba lemsatep.
Laisa tesayurtem dang melung sür malitsüla saka ano temerangba inyakba ajanga kaketshirtemi jenjang tajungba alangzükdaktsütsüla, ta ashi.
Laisa DGC züngsemtem dang longjemer inyakba ajanga DGC-i iba jenjang tongtetogo, yamaji maneni longjemer inyaktsüla, ta ajungshi.
Sentong nungsa History nung Asso.Professor, Meripeni Ngully-i, Jakhalu-i DGC nung inyakdang külem tenzükertem den tesendakatep tajung ayuba aser lai inyakatetba mapatem indang video tatsüka saya.
Vivi Swu (Asst.Professor in History) aser DGC nung tesayur teburtemi Principal nem akhüm agüja ken aten.
Asst.Professor in Sociology, Dr Hannah Tia-i sarasadema sentong tembanga liasü.