DGP Doungel-i Kohima Police indang website sayatsü

Kohima, July 4 (TYO) : Hombarnü Nagaland DGP, L L Doungel, IPS-i Kohima Police indang official website sayatsüogo.
Kohima police indang web portal ji www.kohimapolice.com aser Nagaland nung police website lapokba district tanabubaji Kohima lir. yaküm November ita Dimapur Police Commissionerate-i parnok indang website lapoka liasü.
Police-i loktiliba nung security agütsürtem lir anungji service tajungba agütsütsü atema kanga merangtsüla, ta tanü SP Office nung L L Doungel-i Kohima Police züngsemtem ayongzük.
“Tanü-asüng amshiba technology den asenoka külemi tsüngsü medema anidaktsüla aser ibaji ajanga nübortem tajungba nung tenzüktettsü. Kohima Police indang official website ajanga inyakyim nung tashi angutsü aser public-ia tarendakba kecha melii police den tongteprateptsü akok,” ta paisa metetdaktsü.
DGP Nagaland-isa police dang website lapokba sülen yimbazüa malitsü saka pei lemzükba mapa tali kümkümshia inyaktsü atema tekümdangtsü olen ka shisem.
Tanüngba District Executive Force 9-ia pei indang website lapoktsü imlar, ta L L Doungel-isa ashi.
Tanü sentong nung Senior SP Kohima, Joseph Hesso, IPS-ia o jembidang, nübortem dang nungi osangtsüsang aser tebilembatem bendentsü atema iba website lapoker, ta metetdaktsü.
Iba website nung Kohima district kübok aliba police station, traffic control aser women cell ajak indang temetettsütem lir aser ano public services indang osangtema lir.
Sentong nung mendenji SDPO (North) Puzoto Khatso liasü aser Additional SP Igwangheing Hemang-i anküp tepela o jembi.