DGP Nagaland-i Dimapur Police yarir

Dimapur, June 7 (TYO): June 7, 2019 nü Director General of Police Nagaland T. John Longkumer, IPS-i Commissioner of Police aser Commissionerate Dimapur nung tongtipang ketdangser ajak den rongdak senden ka amen.
Iba senden nung Dimapur district kübok tesem balala nung injang khaloktsüba tatalokbatem benoka lemsatep.
Iba tatalokba bushisüngdangtsü atema Special Investigation Team (SIT) ka tentet aser iba telokji Deputy Commissioner of Police jenjang nung ketdangser kati len ania inyaktsü lemtet, ta Addl. Dy. Commissioner of Police/PRO, Dimapur, Nagaland-i metetdaktsü.
Dimapur nung motorcycle squad ka tentettsü atema DGP Nagaland-i motorcycle tasen 0 alitsü molunga agizük. Iba mapa atema communication sets 40 tashi agütsüogo. District Police tashi itshitsü atema Glock-17 pistol 50 tashi agütsüogo, ta paisa ashi.
DGP Nagaland-isa high capacity CCTVs alitsü atema sen lakh 5 lemzüktsü aser CCTVs ji tongtipang tesemtem nung ayutsü. Tang yua aliba CCTVs ajanga tawa injang khaloktsürtemi amshiba garitem jangjateogo, ta PRO-isa ashi.
Tanü senden nungsa NRL Petrol Pump, 2 ½ Mile anasa police assistant/beat post tasen ka lapoktsü molunga agizük.