Dhaka kiralongraba mapa atema Professor ka den nisung 2 apu

Dhaka, July 17 (Agencies) : Bangladesh nung nisung 22 tepsetba kiralongrartem jenokdaktsüba atema tai tonglokja ketdangsertemi nija university ka nung acting deputy vice chancellor den nisung ana apu.
“Holey Artisan Bakery amakertem nem taa agütsüba ki ka nung anendaktsüba atema North South University’s (NSU) acting pro-VC Gias Uddin Ahsan puogo” ta Deputy commissioner of Dhaka Metropolitan Police (DMP), Masudur Rahman-i osangbener dang ashi.
Ahsan ji NSU nung School of Health and Life Sciences dean lir, ta parnok indang website nung shia lir.
Ahsan’er kinunger Alam Chowdhury aser Bashundhara Residential Area manager Mahbubur Rahman Tuhin na pa den külemi apu.
July 1 nü Dhaka nung Holey Artisan Bakery amakertem Ahsan’er taa agütsüba ki nung anenzük, ta Masudur Rahman-i ashi.
Iba lendong atalokba sülen kiralongrartem den yaritepertemi iba ki toktsür jena ao aser iba tesem nung cartons aika nguteta lir, ta paisa shisem.
Carton tem nungji grenade ayu asü akok ta police-i temulung melemi bilemer. Kiralongrartemi nisung 20 den police ana kahset aser sepaitemia kiralongrar 6 tashi kahset.
Iba tatalokba atema Islamic State-i tenüng agia metetdaktsüogo saka ketdangsertemi ibaji magizüker.