Dhaka lendong nung asür mang pongu ano shingaia mebushii lir

Dhaka, July 10 (Agencies) : July 01, 2016 nü Dhaka nung café ka amakdang nisung 22 asüba lendong nung süsemer telungpur trok tasümang rongnungi pongubo tang tashi tasümang ayuba tesem nung yua lir kechiba süra item tasümang abeni ano shinga maru, ta police-i ashi.
Holey Artisan Bakery amakdang asüba Islamic State (IS) pur tasümang ya Combined Military Hospital, Dhaka nung tasümang ayuba tesem nung yua lir, ta The Daily Star osang ajanga metetdaktsü.
Parnok telungpur tasür pongu ya takar kibong nungi lir aser parnok tenüng Nibras Islam, Rohan Imtiaz, Meer Sabeh Mubasheer, Khairul Islam Payel aser Saiful Islam nunger lir ta jangjaogo. Parnok den külemi asür kabo ano tenüng mejangjateti lir.
Saiful’er kibongi par jabaso tasümang bener oa asüpila sentong aginer, ajisüaka pa mang bener aotsü atema tezüluba ano onok ket matong, ta police-i ashi.
Saiful Islam ya July 01, 2016 nü telungpuri amakba café nung chef inyaka liasü. Iba café amakba mapang telungpurtemi “Tsüngremsa Tuluba,” (Allha hu Akbar) ta yimyim ayima amak.
Item telungpur parnok nisung tenet shi yagi iba café nung aliba nisung 22 tepset aser tasür rongnung bendanger parnok 18 den police 2 densema liasü.
Iba lendong ataloker tananep security force temi item telungpur parnok nisung trok kahset aser ka taküm apu.