Dhaka nung ayongba IPU senden nung Pakistan madentsü

Islamabad, March 31 (Agencies) : April 01, 2017 nü nungi Dhaka nung amungtsü aliba 136buba Inter Parliamentary Union Assembly nung Pakistan madentsü ta Hokolbarnü telemtetba agiogo.
International parliamentary senden nungji Pakistan nungi National Assembly Speaker Ayaz Sadiq-i anir parnok parliamentary züngsem 10 tashi adentsü sentong liasü.
Aji oda süaka, Bangladesh sorkari Pakistan nunger mezüngshi amshiba ajanga iba senden nung madentsü telemtetba agi.
Sadiq-i, Pakistan-i kanga nokdangtsü merangaka Bangladesh osangbenertem aser ketdangsertemi linük atema osang tamajung tali prokba ajanga onok mepelar, ta ashi.
“Anungji ni tang ya Bangladesh nung iba senden nung madentsü telemtetba agi kechiba süra yangji adenyonga kecha tajangzük malitsü,” ta pai ashi.
India aser Pakistan na tsüngda mangatettep adoka aliba tiyalong nung taküm November ita tatemlen Pakistan nung akatsü ayonga aliba SAARC Summit-a Bangladesh dena tanga linük aikati nokdanger aser ibaji ajanga iba senden thinentsüsa akümer.
Tan akatsü aliba 136buba Assembly of the Inter-Parliamentary Union nung Parliament Speaker tem parnok nisung 53 den Parliamentary züngsemtemi tebilemtsütem asoshi teinyaktsütem benoktsü. Parnoki tetsürtem nem rongsenkettsüng mapa nung tebur den saku amuoka meinyakdaktsüba anendaktsütsü asoshi tebilemba dena benoktsü.
Bangladesh den Paikstan-i adianu tesendaktep yimya nung temba ayimtsü kanga nendaka aser meranga inyakogo, ta Speaker-i ashi.
“Cameroon nung 2004 küm Commonwealth Parliamentary Association, Executive Committee senden amendanga Bangladesh Speaker, Sharmeen Chaudhary Commonwealth Parliamentary Association mendenbuba asütsü toktepdang onokibo vote agütsüogo,” ta pai ashi.
Chaudhary-i iba election nungji vote jang 82 angu. Pa anema vote asür nisung 78 liasü. Pai anguba vote 82 rongnungji Pakistan nungi vote 10 magütsü asübo pai iba menden mongutetla.
“Aji oda süaka onoki mapa tajung inyakba parnoki züngshia mali. Onoki aiben jaokaka Bangladesh Speaker-i ozü linük khen danga semdanga mali,” ta Sadiq-i ashi.
Paisa, tesüiba küm ana tashi onoki mepeshiaka Pakistan Parliament-i ayonga aliba international parliamentary senden ajak Bangladesh parliament-i nokdanga arur, ta ashi.