Dhaka nung lendong agütsür asem par class puri reprangteta jangjatsü

Dhaka, July 3 (Agencies) : Bangladesh yimtiba Dhaka nung lendong tulu agüja nisung 20 tashi tepseter kiralongrartem noksa temai adoka prokshiba mapang parnok rongnung nisung asembo tesüiba mapang par class purtemi reprangteta jangjatsüogo.
Kiralongrar rongnung ka, Nibras Islam ya North South University, Dhaka nung par class pur asüba kati reprangtet, ta Deobarnü bdnews24.com osang ajanga metetdaktsü.
Bangladesh nung joko malir nisung kati, Mir Sabih Mubashsher ta ser nisung ka den tang lendong agütsür rongnung nisung ka külemi tangokba noksa ka Facebook nung inoktsü.
Scholastica School, Dhaka nung azüngba mapang Mubashsher’er class pur kati Mubashsher ji March ita A-Level tatidang agitsü mapang ka nungi mangu aküm ta ashi.
Ano Mahbub Rajib ta ser nisung katia Rohan Imtiaz’er kibong rangben külemi tangokba noksa ka Facebook nung lemsatep. Mahbub Rajib ya-a Scholastica nungsa zünga liasü aser iba school ya Dhaka nung tulur aser takariang züngtetba school ka liasü.
Tan nisung 20 tepsetba lendong ya Islamic State (IS)-i tenüng agiogo. Hokolbar aonung Dhaka nung aliba café ka nung iba lendong nung asürtemji bendanger dang liasü.
Iba lendong nung kiralongrartema parnok trok tashi asü. Gulshan, Dhaka tiyong nung aliba Holey Artisan Bakery nung lendong agütsüba mapang kiralongrartemi Islam yimyim ayima liasü.
Kiralongrarte              mi iba café telungi aiter police ana dena tepset aser nisung aika kimai meyoki nokdanga pua ayu.
Honibar anepdang Army commando tem iba bakery tonga aru aser ki telung nung mechioki pua alirtem rongnungi nisung 13 tashi kümzük, kiralongrar parnok trok tepsetba aser ka apu.
Onoki bendanger tasümang 20 angu, ta Army-i ashi.
Kiralongra mapa asadanger telok, SITE-i Honibarnü aonung iba lendong agütsürtem indang noksa temai adoka prokshi.
Police-ia item kiralongrar tasümang noksaa lemsatepogo.
Police tekolakba AKM Shahidul Hoque-i, tan kasetba kiralongrar pongubo police-i bushi liasü aser parnok tenüngtemji ‘Akash’, ‘Bikash’, ‘Don’, ‘Bandhon’, aser ‘Ripon’ nunger lir, ta ashi.