Dhaka tayimtsü anendak bomb lendong IS teloki tenüng agiogo

Dhaka, March 25 (Agencies) : Hopta ka tejakdang Bangladesh elite Rapid Action Battalion aliba tesem nung atalokba sülen Hokolbar aonung taküm bendanga agütsür bomb pokloktsür nisung kati Dhaka international airport nung pa temang nung aliba bomb pokdaktsü. Iba lendong Islamic State telungpuri tenüng agiogo.
Bomb pokdaktsüsangji jean aser shirt semer liasü aser arishi küm 30 shi asütsü akok. Pa teberem nung alenloka aliba bomb ji pai Hazrat Shahjalal International Airport nung aliba police outpost nung pokdaktsü.
Iba nisungji shibar ano mejangja aser iba lendong nung shinga meyiru.
Police-i, iba nisung jagi trolley bag ka nung bomb asem inoka bener liasü aser item bomb temji sepaitemi bomb pokdokba tesem (controlled-explosion) nung bener oa pokdokdang police dena nisung pungu yiru, ta ashi.
“Iba nisung jagi pa dak alenloka aliba tapoktsüji police checkpost ka jakdang pokdakja pa dena pokset,” ta police ketdangser tejen kati osangbener dang ashi.
Dhaka police commissioner Asaduzzaman Mia-i, police-i kanga yakyaka mita aliba ajanga iba telungpur jagi outpost arua memakteti pasasa pokseta asütsüsa aküm, ta osangbenertem dang ashi.
Osang ajanga ashiba agi, iba nisung jagi tayimtsü anenba tesem telungi aiba gate nung nokdaka alisang police ji nükjidong sür aru asütsü akok.
Lendong ataloker ghonda ishika lir külen Islamic State (IS)-i iba lendong parnoki atalokdaktsü, ta parnok sangdong ka ajanga metetdaktsü.
Dhaka international airport checkpoint nung aliba Bangladesh police nükjidong sür iba bomb apok, ta sangdong nungji shia lir.
Ajisüaka Bangladesh-i tanga mapangtem nunga IS-i lendong agütsü ta ashiba mapang, linük nung bendanglen nungi aruba kiralongrar mali ta shia aru.
Iba lendong ya nikongdang 7:00 meta atalok, ta Armed Police Battalion Assistant Commissioner Tanzila Akter-i osangbenertem dang ashi.