Dhanawade-i runs 1009 yanglua otsü tasen yanglur

Mumbai, January 05 (Agencies): Mumbai nung alir asangur, Pranav Dhanawade-i inter-school cricket asayamong nung runs 1009 tashi yanglua alima nung runs 1000 aser tema yanglur mezüngbuba cricket asayar kümogo.
KC Gandhi Higher Secondary School asayar, arishi küm 15 tain Dhanawade-i ball 323 nung runs 1009 yanglua par teloki Arya Gurukul telok madak takok angu.
Dhanawade-i minute 395 nung fours 129 aser sixes 59 tashi yanglua iba alizüngji angu.
Dhanawade-i tebangkatsüba shilem agiba sülen par teloki asaya anogo 2 buba nung ajak agi runs 1465 yanglua tesüiba mapang, 1926 nung Victoria teloki runs 1107 agi New South Wales telok madak takok ngua yangluba otsü ajangteta world record tasen ka yangluogo.
Dhanawade-i tesüiba mapang, 1899 küm AEJ Collins-i par Clark’s House telok asoshi runs 628 yangluba otsüa ajangteta cricket asaya shilem ajunga nung runs timba yanglur asayar kümogo.
Class 10 kaketshir, Dhanawade ya Mumbai Cricket Association (MCA) coach mongin, Mobin Sheikh-i anitetba autorikshaw anishir ka jabaso lir.
Dhanawade-i yasüng tashi nung ajak agi runs 652 tashi yanglua cricket asaya shilem ajunga nung runs timba yanglur asayar aküm.
“Runs 1009 tashi yanglutsüji temela masü. Iba ama shilem agiba ajanga Dhanawade dak bendanga agütsüba aser asayatsü sempet aliba kuli sayur. Pa ama asayar tajung anitettsüji kanga dang tongtipang,” ta India ODI & T20 captain, Mahendra Singh Dhoni-ia Dhanawade nem tenüngsang agüja metetdaktsü.