Dhansiri nungi Zubza train lenmang

2003 küm taoba Prime Minister, Atal Bihari Vajpayee-i Nagaland semdangi arudang Dimapur-Kohima National Highway 39 four lane küma yanglutsü atema sen crore 400 lemzüktsütsü ta osang sangoktsü. “National Highway 39 ulushitsü atema Centre-i sen crore 400 agütsütsü aser sangküm nungi mapa tenzüktsü” ta Vajpayee-i ashi, saka küm 13 süiaka Dimapur-Kohima gari lenmang nung temelenshi kecha mali, kasa dang lir. Vajpayee-i Dimapur-Kohima highway project indang osang sangoktsür küm 10 shi lir külen ano Prime Minister Narendra Modi-i aniba NDA sorkari iba project approve asü aser yaküm November ita Union Minister for Transport, Highways & Shipping, Nitin Gadkari-i iba mapatong inyaktsü atema Patkai Bridge lenjem anasa lung azünga yutsüogo. Rajya Sabha nung Gadkari-i, “Kohima-Dimapur National Highway-39 ji taruba küm pezü tsüngda sen crore 1,098 endoka yanglutsü” ta osang metetdaktsüogo, ajisüaka tanü tashi iba mapa tenzüka inyakba mong mangur. August 1, 2016 nü Union minister of Railways, Suresh Prabhakar Prabhu-i Dhansiri nungi Zubza (Kohima) tashi train lenmang yanglutsü atema lung azüngtsüogo aser iba mapa atema sen crore 2315.30 lemzüktsüba metetdaktsüogo. Kilometer 90.5 tasazük Broad Gauge (BG) train lenmangji 2020 küm tashi nung tembanga yanglutsü ta mapang lateta lir, saka Suresh Prabhu-ibo küm ka jelia mapa tembanga inyaktsü ta nangzükogo. 2007 küm Dhansiri nungi Zubza (Kohima) train lenmang ya national project ka ta züngok aser mapatong shilem asem lemsar inyaktsü renema lir. “Mapa inyaktsü atema senotsü tetsükdaktsü kecha mali aser taoba mapang nungi ministry-i senotsü talila lemzüktsüogo” ta paisa shiogo. Railways Minister-i Nagaland semdangba mapang maongka agia, Nagaland chief minister, TR Zeliang-i Dimapur Railway Station dak sendakba onük kar lemsatep aser itemji Dimapur Railway Station nung tang rongdak nüngdakbatem lir. Nagaland Chief Minister-i tezüluba ka nung ashiba agi, “Dimapur Railway Station ajanga Nagaland aser Manipur State nung alirtem tenzüker saka iba station nung nübortemi nüngdakba facility peria mangur.” Dimapur nung Rajdhani Express aser Jan Shatabdi Express train tem minute 5 atema dang anenzüker, anungji minute 10 bosa anenzüktsüla aser Dimapur Railway Station nung PRS counter 4 lapoktsü, Cloak Room lapoktsü aser Cold Water Pot agütsütsü atema T.R Zeliang-isa metetdaktsü. Paisa, Dimapur aser Guwahati tsüngda Shatabdi Express Jorhat tashi moi station ana tsüngda dang senzütsü, Dimapur nem Rajdhani Express nung A2 coach talila lemzüktsütsü, Dimapur Railway Station nung kilem aliba platform ka dang anungji kilem aliba platform ana yangluloktsü atema Railways Minister dang mepishiogo. Süra, train lenmang tasen yangluba dang nungibo tang Nagaland nung mozü ama aliba Dimapur Railway Station ya-ang jenjang tajungba küma yanglushitsüba jiang tongtipangba ta bilemer. Asenoki kanga junga shisadangra, Zubza tashi train lenmang yangluba agibo Naga nunger nem tajangzük balala magütsütsü. Asen state yimtiba Kohima tashi, mesüra Kohima adena Manipur/Mokokchung tashi train lenmangji yanglur ka asünungbo kanga tajangzük asütsü aser ibaji ajanga nübortem teyari tulu ngula. Iba kasaji, Dimapur-Kohima National Highway 39 four lane yanglutsü melena tang aliba gari lenmang ya-ang tajungba küma yanglu nung tajungba süla. Union Minister, Suresh Prabhu-ibo Hombarnü Dhansiri nungi Zubza tashi train lenmang yanglutsü atema lung azünga yutsüogo, saka küm 10 sülena train lenmang yanglutsü aliba aremjia leppoka mai lira, shir akoksatsü ? Centre sorkari agütsüba sen meshiabo achi, paper nungbo inyakogo ta kuli sayu, saka mapabo kecha meinyak ta süra asenok Naga nungersa akoksar anentsü. Anungji, iba mapa yabo tesüiba mapang ama mesüi, asangsang nung tembanga inyaktsüsa sorkari khuret abentsüla aser nübortemi tenük yoka mapang shia ola adoktsüla.