Dhanush-i Twitter nung pa sülen anidaker dang pelaba metetdaktsü

September 13, 2015: Twitter nung actor Dhanush sülen anidaker (followers) million ana akümba atema pa sapurtemi pa meimba aser nungitba asoshi pelaba lemsatepdang pai, “Ni nenok taginüba tongtsütsü asoshi kanga meranga inyaktsü,” ta ashi.
Tamil drama film “Aadukalam” nung tongti shilem agisang ya southern superstar Rajinikanth’er jala, Aishwaryaa kinüngbo lir aser twitter nung pa sülen anidaker nisung million ana akümba atema pa kanga pelaba twitter ajanga lemsatepa liasü.
“Million ana! Nenok ajaki temeim sayuba, nungitba aser ajungmesoba asoshi kanga pelar. Nenok jangratemdaktsütsü atema ni ano tali meranga inyaktsü. #spreadlove,” ta Deobar nü Dhanush-i twitter nung lemsatepogo.
Pai tang tashi nung film 25 nung shilem agia lir aser iba den külemi 2013 küm Hindi film “Raanjhanaa” nunga shilem agia lir.
Pai tanabuba shilem agiba Hindi film “Shamitabh” kangabo takok mangu saka pai kanga junga shilem agitetba ajanga nübur ajaki tushiogo.
Pa indang company ‘Wunderbar Films’ ajanga pai film produce asüba mapaa inyaker.
Dhanush-i tesüsa shilem agia aliba film ji Balaji Mohan-i direct asüba comedy “Maari” film lir. Bollywood nung ano pa “Raanjhanaa” film direct asüsang Aanand L. Rai den külemi inyaktsü sentong lir.