Dhawan-i ‘day-night Tests’ asayatsü jangrar

Hyderabad, May 8 (Agencies) : India nunger cricket asayar telok nungi opener Shikhar Dhawan-i, ‘day-night Test match’ asayatsü kanga jangra atar aser iba asayamong ajanga tarutsü asayatem atema terenlok bener arutsütsü, ta ashi.
Board of Control for Cricket in India (BCCI)-i India aser New Zealand na tsüngda day-night Test asayamong ka asayadaktsütsü sentong atongdar.
“Onoki shitakba nung kanga pelateper,” ta Dhawan-i ashiba Honibarnü cricket.com.au osang ajanga metetdaktsü.
“Temelenshiji teti tajung asür. Iba sentong ya atalok nungbo bowler aser batsman tem ajak atema ibai asaya yimya tasen ka ama asütsü. Anüngdang aser aonung test asayatsüba ya tan tasen lir aser ibaji tendangtsüji jangratemtsüka asütsü,” ta pai ashi.
Dhawan ya tang tasayadak Indian Premier League (IPL) asayamong nung Sunrisers Hyderabad telok nungi asayadar. Tan pai out mesüi runs 47 yanglutetba ajanga Gujarat Lions koka liasü.