DHD 1buba graduation sentong den Ketsovole Kire award agütsü

Dimapur, December 08 (Agencies) : Brihostibarnü School of Nursing District Hospital Dimapur (DHD) Chapel Hall nung 1buba graduation sentong den Wt. Ketsovole Kire award agütsüba sentonga repa agi. Iba sentong nung Environment, Forest & Climate Change Minister, Dr. Nikiesalie Kire tongti tesemdanger aser Health & Family Welfare nung Principal Director, Dr. L Watikala tetushi tejaoker liasü.

School of Nursing, DHD ya Assam Nursing Council kübok lir aser 2013 küm February ita nungi iba school nung nisung lir (40) nem training agütsür.

Taküm School of Nursing Dimapur nungi parnok 36, Mokokchung nungi 23 aser Kohima nungi 26-i GNM renemogo.

State kübok Nursing school asem rongnungi taküm School of Nursing Dimapur nungi Vehodulu Swiho-i marks timba nguteta lai asür Wt. Ketsovole Kire Award angu. Iba award nung sen aser kulikaket dena lir.

Dr. Kire-i, sorkar mapa dak dang merangloktsüla, nurse kaji lenmang aisü nung nüngdak. Mapa reprangdangra asenok tangar dang nungi khenyongi tajungba lir. Timtemertem yaritsü renemshiang aser tangar yariba ajanga na temulung asütsü merangang, ta tan GNM renemertem ayongzüka jembi.

Nurse renemertem nem parnok takok anguba atema tetushi agütsüba mapang Dr. L. Watikala-i, nurse kaji kanga nüngdak anungji nenok nurse ka ama mapa tenzüka aodang shiranger aser yiruyipongertem anepaludang temeim agi bendanga agüja yaritsüla, ta ayongzük.

Award angula, Vehodulu Swiho-i, asür Wt. Ketsovole Kire’er kibong dang iba award agüja nurse tem ajungshiba atema pelaba metetdaktsü.

Nursing institute aser department-i onok takok ngutettsüsa ya tashi tesayuba tajung agüja len aniba atema pelar, ta laisa shisem.

Tan graduate asürtem tenüng nung Kevikono Khro-i o tatsüka jembi, Retd. MD, NSC Bank, Sedehol Sale-i la kinungbo tetsü, asür Wt. Ketsovole Kire indang taküm otsü tatsüka ashi aser UCTM Dimapur, nung Tir, Rev. Dr. Phuveyi Doo-i GNM renemertem asoshi bendanga agüja sarasademtsü.

Sentong tenzükdang School of Nursing, Dimapur nung Principal Nepralu Keyho-i tarurtem pela agizük aser tatem nung Medical Superintendent, DHD Dr. CW Tongoe-i anküp tepela o jembi.