DHD indang ali atema patta agütsürtem merenshitsü

Dimapur, Mongputeni (October) 15 (TYO): District Hospital Dimapur (DHD) ali atsünga agitsü atema ozüng alema land patta agütsüba atema tebilemtsü bena state sorkari patta agütsüba ketdangsertem merenshitsü telemtetba agiogo.
Tanü Dimapur Commissioner indang office nung district administration aser DHD ketdangsertem den ajurutepa senden amendang Health & Family Welfare minister, S Pangnyu Phom-i iba osang metetdaktsü.
Sorkar aser bangdak department-i kuli mereprangi patta nung sign asüba ketdangsertem dak temerenshi alitsü, ta Pangnyu Phom-i ashi.
District Hospital Dimapur (DHD) ya Naga nunger aser kidangsüa aliba state tem nung alirtem temang anepaludak tongti ka lir. Anungji iba mozü ki nung anepalurtem temeten kümzüka ayutsübaji sorkar aser sensotem indang tebilemtsü lir. Ajisüaka, ozüng alema ali atsünga agiba ajanga mozü ki nung terenlok mapa meinyakteter aser tetsükdaktsü ajurur, ta paisa shisem.
Patta yanglur ali atsünga agir nisung 9 rongnung pezü indang patta agienogo aser ana DC order ajanga regularized süogo. Ajisüaka, tanüngba indang osang kecha mali.
Minister Pangnyu-i Deputy Commissioner dang jungjunga bushiteptsü aser DHD ali atema ozüng alema yangluba land patta ajak agientsü atema tetuyuba agütsü.
Paisa district administration dang nisung shingaia DHD ali atema patta magütsütsü tenokdangba agütsütsü atema ayongzük.
Kasa maparen ya District Hospital Kohima nunga inyakdar, ta Pangnyu-isa shisem.