Dhemaji nung CAA anema sentong tulu ka agi

Dhemaji, February 4 (Agencies): Mongulbarnü Dhemaji nung Asom Jatiyabadi Yuba Chatra Parishad (AJYCP), Krishak Mukti Sangram Somiti (KMSS) and All Tai Ahom Students Union (ATASU) aser tanga CAA anemba teloktemi ‘Djhemaji Bikhhyoov (Mass rally) ayonga agiogo.
Sorkar dang CAA meyipa agitsü aser KMSS lennir Akhil Gogoi chioktsü takhangba agüja parnoki lungkak ait.
“CAA anema lungkak aitba ajanga Delhi aser Dispur anokshir aser iba jagi BJP-i nisung kar ashioktsütsü atema sen crore aika endoka ‘Peace Rally’ ayonga agir,” ta senior journalist Ajit Kr Bhuyan-i tanü o jembidang ashi.
CAA-2019 ajanga BJP-i Assam nung ozüng alema arurtem lidaktsütsü meranger aser lisopurtem anema tasa atonger inyaker, ta paisa ashi.
“Sarbananda Sonowal ama lennirtemi Assam nunger ashioktsüogo. BJP-i küm shia nisung crore ana nem mapa agütsütsü aser Bangladeshi nunger meyipa yoktsü ta nangzük saka ibaji parnoki tamakok nguogo” ta Bhuyan-isa shisem.
BJP-i CAA anema noktakba azüoktsü atema tim mesüi inyaker. Parnoki tasa atonger KMSS lennir Akhil Gogoi aser tanga lennirtem puogo, ta paisa metetdaktsü.
Taruba assembly election nung BJP atsüngdoktsüla. BJP sorkari CAA anema lungkak aitba paitokdaktsütsü atema Assam nung ‘Film Fare Award’ aser tanga sentongtem ayonga agir, ta paisa ashi.
Sonowal ya “puppet” ka lir aser pa anir par minister temi Centre-i tuyuba ka danga meindoki inyaker. Assam nungertem atema majung ta metetaka, parnoki inyaker, ta Bhuyan-isa metetdaktsü.
“BJP sorkari Assamese lisopurtem maitsü nung tarak kettsütsü atema tasa tamajung atonger inyaker” ta AJYCP general secretary Palash Sangmai-ia ashi.
Assamese nunger taginübatem kümzüka ayutsü atema AJYCP-i ‘Inner Line Permit’ mapa tenzüktsü atema sorkar nem takhangba agüja arur, saka sorkari ibaji mangashir, ta Sangmai-isa shisem.
Assam nung lisopur taküm aser taginübatem ILP system ajanga dang kümzüka yutettsü, ta paisa ashi.