Dhemaji nung election agishiba nung voter shilem 43.5-i shilem agi

Guwahati, April 09 (Agencies): Deobarnü Assam, Dhemaji Assembly constituency bypoll agiba nung nikongdang 1:00 ako tashi nung vote agütsürtem shilem 43.5 tashi arua shilem agiogo.
Polling booth kar nung technical timtem adokba osang ajanga angazükogo. EVM 8 aser Voters Verifiable Paper Audit Trail (VVPAT) 28 teroto tashi nung melenba metetdaktsü.
Dhemaji constituency polling booth ka nungbo EVM mapa meinyakba ajanga gondha 3 shi menur ang vote agütsü tenzük.
“Vote magütsü tsüngda EVM tendangdangbo shitak dang mapa inyaka liasü, saka vote agütsü tenzük dang machine nung timtem adoka Bordoloni, Barabhuyan LP School polling station nung vote gondha 3 agi menur ang agütsü tenzük,” ta Dhemaji LAC Returning Officer, Roshni Aparanji Korati-i osangbenertem dang ashi.
Election department-i EVM melentsü asoshi lemtet, ta Dhemaji district Deputy Commissioner Korati-i ashi. “Iba sülen anepdang 10 ako nungi vote agütsü tenzük,” ta lai ashi.
EVM nung timtem adokba polling station nung vote agütsüba mapang nikongtsütsü 4:00 süir gondha asem atsülangtsü mesüra matsülangtsü ta asüngdang dang, Returning Officer-i, iba booth nung Presiding Officer-i osang agütsüba aser temepishiba dak ajemdaker inyaktsü, ta ashi.
Iba menden asoshi candidate ajak agi par 5 tokteper aser iba nung tongti tetokteperji, BJP nungi Ranoj Pegu aser Congress nungi Babul Sonowal na tsüngda lir.
Tanüngba candidate asemji CPI(M) nungi Jadu Hazarika, SUCI(C) nungi Hem Kanta Miri aser Independent candidate Rajkumar Doley lir.
Iba bypoll ya booth 273 nung agia liasü aser ketdangsertemi polling stations 20 kanga dang timtem aliba station ta metetdaktsü.
Maneni iba constituency nung voter ajak agi 2,19,751 lir koba nung tebur 1,12,510 aser tetsür 1,07,241 lir.
Assam Chief Minister Sarbananda Sonowal-i Parliamentary menden azüngtettsüba sülen Lakhimpur nungi BJP MLA Pradan Baruah Lok Sabha nung MP shimba ajanga iba constituency nung election agishitsüsa aküm.