Dhemaji tensa tajungba kümdar; NBBUSS telok nem temelaba magütsütsü

Guwahati, March 10 (Agencies): Assam Chief Secretary, VK Pipersannia aser Assam Police DGP, Mukesh Sahay na den ketdangsertemi osang metetpelatsü atema Silapathar semdang.
Iba mapang State Home Commissioner Bhaskar Musahary aser Assam Police Special Branch ADGP Pallav Bhattacharya nata dena liasü aser parnoki Dhemaji district administration ketdangsertem den ajurutepa senden amen. Parnokisa AASU office semdanga liasü.
Chief Secretary VK Pipersania-i osangbener den ajurutepa jembidang, tensa tajungba kümdar, ta ashi.
Paisa nisung ajak dang yimjung meraksatsü atema mepishia metetdaktsü.
Nikhil Bharat Bengali Udbastu Samannay Samitee (NBBUSS) nem lokti sentong ayongzüktsü asoshi temelaba magütsütsü, ta Assam Police-i metetdaktsüogo.
Hindu Bengali pusemba telok yagi Hombarnü All Assam Students’ Union (Aasu) Silapathar office raksatsü.
“Kija aser yimtenren den sendaktepba mesüra tesentaktep maliba teloktemi timtem bener arutsüba ajanga state nung tensa raksatsür. NBBUSS-i Hokolbarnü Mayong nung public rally ka alitsü ayongzük saka ibaji thitsüogo,” ta Assam Police tanishir, Mukesh Sahay-i ashi.
NBBUSS ya Nagpur nung amenoker inyakba Hindu pusemer Bengali telok ka lir. Parnoki Bangladesh nungi aruba Hindu Bengali nunger nem senso agüjang ta takhangba agütsür aser parnok tesüiba küm ana tashi Assam nung mapa inyaker, ta Sahay-isa ashi.
“NBBUSS indang mezüngbuba lokti sentongji Silapathar public rally liasü. NBBUSS ya ozüngi nokdanga aliba telok ka masü, anungji ketdangsertemi sentong agitsü atema parnok nem temelaba agütsü. NBBUSS-i Aasu office amakbaji mezüngyongi tasa atonger inyakba asü masü metettsü atema bushisüngdang südar,” ta paisa shisem.
Tarutsü nung lokti sentong alitsü atema temelaba meshidang district police temi ‘standard operating procedure’ kübok mapa inyaktsü tetuyuba agütsüogo, ta Mukesh Sahay-isa metetdaktsü.
Assam nung NBBUSS nem senotsü teyari agütsüba indang inyakyim bushisüngdang südar. Parnok indang maparen aser nükjidongtem metettsüla aser senotsü arubalen osang tejangja alitsüla. Tang tashi nung parnok lennir aika puogo aser parnok dang asüngdangya asüba ajanga kuli aika angutsü, ta paisa ashi.
AASU office amakertem nisung 30 shi pua lir aser nisungtem ajungmesoba atema tai tonglokja alisang Subodh Biswas aputsü atema bushidar, ta Sahay-isa shisem.
Dhemaji district nung tensa tamajungba akümtsüa akok ta arendaka bilemba agi Army renema lir. Security forces company 14 tashi mapa lemzüktsüogo, ta Special DGP Kuladhar Saikia-ia osangbener dang metetdaktsü.