Dhola-Sadia apu ajanga Defence tenüngdakbatem peridaktsütsü: Assam CM

Guwahati, May 16 :Mongolbarnü Guwahati nung Assam state BJP party-i BJP nung mapa inyakertem nem tenüngsang aser tetushi agütsüba sentong ka ayonga amongba mapang Assam Chief Minister Sarbananda Sanowal BJP züngsemtem nem tetushi  agütsüba mapang tangokba noksa nung angur.

Guwahati, May 16 (Agencies): Assam Chief Minister Sarbananda Sonowal-i Hombarnü ashiba agi, Dhola-Sadia apu koba May 26 nü PM-i lapoktsütsü ali, iba ajanga linük nung ‘defence’ tenüngdakbatem peridaktsütsü.
“Dhola-Sadia apu ajanga Sadia nung aliba nüburtem timtem aser tekangshi ajema kümdaktsüba dang masü saka linük ‘defence’ nem teyari agütsütsü, kechiyong Arunachal Pradesh ya China arrtsü nung lir,” ta Sonowal-i ashi.
Kmilometer 9.16 talang apu ya linük nung talangtiba apu lir. Assam nung Sadia aser Arunachal nung Dhola tesem sendaktepdaktsüba apu ya Ato kilonser Narendra Modi-i lapoktsütsü.
Upper Assam kübok Dhola tesem nung apu yangluba kanga junga asadangba senden ka nung CM-i apu yangluba company dang May 22 tashi nungbo apu yangluba tembangtsü asoshi tetuyuba agütsü.
NH 37 talisa Sivasagar, Jorhat aser Numaligarh adena aoba lenmang kanga majuba nung temolung mesüi CM-i tangsa yanglutsü asoshi tetuyuba agütsü.
Maneni Sonowal-i Dhemaji district kübok Gogamukh tesem nung Indian Council of Agricultural Research campus atsülangtsü asoshi benokdanga aliba tesem semdang. Iba tesem nung May 26 nü PM-i nüngshi long azüngtsütsü.