Dhoni-i ‘M.S. Dhoni – The Untold Story’ film sayatsüogo

New Delhi, August 11, 2016 : India nunger cricket asayar mongin, Mahendra Singh Dhoni taküm otsü nung ajemdaker yangluba film “M.S. Dhoni – The Untold Story” tanü, Brihostibarnü Delhi nung aliba school ka nung Dhoni-i sayatsüogo.
Kulachi Hansraj Model School (DAV institute) nung Dhoni-i iba film sayadang film nung Dhoni ama shilem agisang actor Sushant Singh Rajput-a liasü. Iba film Neeraj Pandey-i direct asü aser Fox Star studios den külemi iba film produce asüsang Arun Pandey naprong sentong nung dena liasü.
Dhoni aser Sushant naprong DAV institute den tesentaktep lir. Dhoni Ranchi nung aliba DAV institute nung azüng aser Sushant-a Delhi nung kasa institute nung zünga liasü.
Schoo ajanga tajangzük agütsüba jembidang Dhoni-i, “Ni DAV Ranchi nung zünga liasü. Ni teti taküm nung school mapang tajungba ta ashir. School nung ketdangsertemi kaketshisatsü dak alia ano nüngdakba tapu ajak peria sayuba atema tenüngsang agütsür,” ta ashi.
Pai, “Iba school nung pei-i meimba saisapong mashi ka asayadang shingaia nema merepranger. Aser school ka nungji iba jaklaji kanga nüngdak,” ta shisem.
School tanurtemi o zülu balala den Dhoni noksa agi tejak nung semokba yanglur pei amenba menden ma nung tua nokdaker kanga pelatepba ajanga Dhoni nüngutgu asüba tali jangjadaktsü.
Iba film atema inyakertem aser Dhoni nunger nisung 700-i agizük aser parnok nem Vedas kaket, DAV indang coffee table kaket aser naro jung kaka agütsü.
Fox Star studios-i, M.S. Dhoni – The Untold Story film September 30, 2016 nü sayatsü, ta metetdaktsü. Iba film ya Cricket asayaba tsütsü Dhoni-i kanga meranga tua nüngtugu akümba otsü lir.
Film nung Sushant-i cricket asayar jilu kanga meranga iogo. Pai cricket asayar ka jilu junga aiba dang masü saka Dhoni ama ngudaktsütsü atema kou-a pa mesük ayu.
Iba film nung Anupam Kher, Bhoomika Chawla, Kiara Advani, Herry Tangri aser Disha Patani nungeria shilem agia lir.