Dhoni taküm otsü film agi sen crore 100 dak tema aatetogo

Mumbai, October 9, 2016 : India nunger nüngtugu cricket asayar aser India team captain Mahendra Singh Dhoni indang taküm otsü nung ajemdaker yangluba, “M.S. Dhoni: The Untold Story” film ajanga tang tashi nung sen crore 100 dak tema aateta lir.
Neeraj Pandey-i direct asüba film nung Dhoni Ranchi nung asayaba mapang nungi India cricket team atema captain akümba otsü dena lir. Iba film ya September 30, 2016 nü saya aser kasa film nung Dhoni okrongba den tetsür den medemba otsütema densema lir.
Iba film yagi Honibarnü sen crore 5.20 aatet aser ibaji ajanga film sayanü nungi Honibarnü tashi nung sen crore 103.4 aatet, ta film yanglurtem tenüng nung sangdongba osang ka ajanga metetdaktsü.
Fox Star Studios aser Arun Pandey of Inspired Entertainment-i produce asüba film nung Kiara Advani, Disha Patani aser Anupam Kher nungeria tongtibang shilem kar agia lir.
Fox Star Studios nung CEO, Vijay Singh-i, “MS Dhoni film meimertem ngua onok tali ajemalushir. India box office nung sen crore 100 tashi aatetba ya India cricket team captain rongnung takok timba bener arütsüsang, Mahendra Singh Dhoni meimertem ajanga lir. Iba film ya onok asoshi khenyongi balaka aser iba film takok asoshi film atema inyakertem aser shilem agirtemi meranga inyakba aser nüburtemi nungitba atema ajak dang kanga pelar.” ta ashi.
Anupam-i, “Neeraj Pandey, nai iba film ajanga nisung million aika atsüa arutetba aser kü dak maneni temulung alemba atema kanga pelar,” ta tweet asü.
Tang film tasen “Mirzya”, “Tutak Tutak Tutiya” aser “Queen of Katwe” saya liaka MS Dhoni film maneni kanga junga odar.