Dhoni tashi medemdangtsü makok: Fleming

Luchii/December 1, 2018 (Agencies): West Indies aser Australia den asaya atema T20 squad nungi tenüng zütokba sülen MS Dhoni tarutsü dak sendakba nung ken o aika temai adoka jembiogo. Ajisüaka Stephen Fleming, shiba Indian Premier League (IPL) nung Chennai Super Kings (CSK) aser Rising Pune Supergiant (RPS) nung shilem agiogo, pai taoba India captain 2019 World Cup nung asayadaktsütsü asoshi pusemogo aser ashiba agi, Dhoni indang tashi ya kecha dena medemdangtsü makok aser pai asaya tulu nung shilem agitsü asoshi yongyaa atar, ta ashi.
“Dhoni shimoktsü asoshi India squad nung option aika lir, kechiyong pa indang tashi ya medemdangtsü makok. IPL nung pa asaya reprangogo aser pai taoba mapang nung bat asüba ama tang tashi kanga junga bat südar,” ta Fleming-i Gulf news dang ashi.
“One Day Internationals nung yamaji asayatettsü asoshi pai pa sasa dak temulung alemtsü nüngdakaer aser pai asayamung tulu nung shilem agitsü asoshi yongyaa dang atar, ta nibo bilemer,” ta arishi küm 45 tain Fleming-i ashi.
Tawa Dhoni-i batting kangabo junga mesüi arudar aser iba ajanga India team nung pa jenjang dak sendakba nung ken o aika temai adoka jembidar. ODI cricket India-i amokbanger asayaaka middle-order nung tibelemtsü lir kong Dhoni kangshidar.
Taküm asaya 10 nung asayaba sülen MS Dhoni-i run 225 yanglua lir aser pa indang strike rate 67.36 lir.