Dhubri nung atsü yangluba nung temulung masür: Rajnath

Guwahati, January 5 (Agencies) : Union home minister Rajnath Singh-i Hombarnü Assam kübok Dhubri tesem nung India-Bangladesh arrtsü nung atsü yangluba semdangogo aser pai iba atsü yangluba nung temulung masüba olen ka metetdaktsü.
Deobarnüa Rajnath-i All Assam Students’ Union (Aasu) lennirtem den külemi Karimganj nung atsü yangluba reprangdangogo.
“India aser Bangladesh tsüngda kilometer 263 shi kati arrtsüa lir. Ajisüaka, Dhubri sector nung atsü yangluba mapa nung tajitettsü aika liasü. Dhubri nung tang teinyakdak mapatong ana asoshi onoki teinyaktsü kar asayameyang asütsü tenzükogo” ta home minister-i ashi.
Onoki iba mapatong ajanga tajangzük anguba reprangdangnür. Onoki Assam Accord atema olemtep ka kanür aser iba atema Aasu dang shiogo” ta Rajnath-isa shisem.
“Centre-i tzümetsüng aser alima tatalokbatem nungi jenbua alitsü atema mapa inyaktsü mulunga lir. Iba atema onoki state sorkar den jembinür. Lisopur aliba tesemtem nung bendangeri ali atsünga agir aser iba khuret atema state aser centre sorkartemi mapa kar inyaktsüla” ta paisa metetdaktsü.