Diana Hayden-i Tripura CM Biplab Kumar Deb aitsür

Agartala, Rongchii (April) 27 (Agencies): Tripura Chief Minister Biplab Kumar Deb-i kechiba Diana Hayden nem “Miss World” korang agütsü ta asüngdangba sülen anogo ka lir Diana Hayden-i o meyiptsüogo.
Model aser actress Diana-i ashiba agi, “minister Deb ji tongtipang menden ka nung mena lir anungji o kümdanga jembitsüla.”
“Ni tanur asüdang nungi sentsü balaka asüba atema shimdanga amshiba inyakyim den rarayonga arur aser ni takok nguogo. Nisungtemi ni metilutsüi ni tongtetba atema ang nüma tanga bilemtsüla. Kü temulung yirutsüogo. Minister ji tongtipang menden ka nung mena lir anungji pai jungjunga shisadanger ang jembitsüla” ta lai osangbener dang ashi.
“Kü sentsü balaka saka asenok ajak India sensotem lir aser iba atema asenoki nüma tanga bilemtsüla. Ni kü sentsü balaka asüba atema nüma atanger aser pa (Deb) aitsür” ta Diana-isa shisem.
Aishwarya Rai ya India tsür ka ama lir saka taoba Miss World Diana Hayden bo masü, ta Yangtepnü (Brihostibar) Tripura CM Biblab Deb-i metetdaktsü.
“Aishwarya Rai-i India tsür tenüng nung noktaker aser la Miss World aküm aser ibaji tim dang saka ni Diana Hayden indang topur mangateter” ta Deb-isa ashi.
Agartala nung aliba Prajna Bhavan nung handlooms & handicrafts indang workshop ka nung jembidang, “Akhi mapang India tsürtemi cosmetics mamshi. India nungeri shampoo mamshii, parnoki methi agi kou alok aser lishi agi tzü tzüko. Topur ajung toktepba ayongertem ya international marketing mafia lir. Tanü asen linük nung kinük ajaklen beauty parlour lapoka lir” ta Biblab Deb-isa shisem.
Deb-isa Miss World takok angur aser Bollywood actress Aishwarya Rai nem tenüngsang agütsü aser la yagi India tsür maitsü sayur ta shisem.
“Asenoki tetsürtemji goddess Laxmi, Saraswati ama repranger. Aishwarya-i India tsür maitsü sayur. Lai Miss World takok angu aser ibaji tim dang, saka ni Diana Hayden topur mangateter” ta Tripura Chief Minister-i ashi.