Diana sür küm 20 ajungba nüngtem nung atsü tasen ka lapoktsütsü

London, March 20, 2016 : Princess Diana sür küm 20 ajungba nüngtem nung la nem akhümtsübu agütsüba temaitsü atsü ki tasen ka lapoktsütsü sentong yangludar, ta Deobarnü Kensington Palace sangdong ka ajanga ashi.
Princess of Wales, Diana arishi küm 36 asüdang, 1997 küm gari tsükoka asüba sülen la nem la dak apet tetushi agütsütsü asoshi atongba sentong aika takok monguteti aruba sülen tan iba sentong ya yanglurba lir, ta Mirror osang ajanga metetdaktsü.
Iba sentong acha ayanger, Historic Royal Palaces-i ashiba agi, la nüngtem nung lapoktsütsü aliba atsüji tang tetenzükdak lir.
Iba ya takok ngua renemtet nungbo London nung Diana nüngtem nung memorial pezübuba renemer asütsü.
Historic Royal Palaces-i iba atsüki tasenba indang project nung yariteptsü atema atsü repranger tasen ka nüngdaka tawa osang prokshiogo, aser iba atsüki ya August 31, 2017 tashi nung renemtsü imlar.
Kensington Palace nung otongdar kati ashiba agi, iba sentong ya palace ketdangsertemi asameyanger aser Historic Royal Palaces-i acha ayanger.
Diana’er jabaso ana, Duke of Cambridge aser Prince Harry na danga iba atsüki tasenba indang project osang tejangja shidar, ta pai ashiba BBC osang nung metetdaktsü.
Diana asüba mapang arishi küm 12 alisang, Harry-i, kettsü otsü mesamai taküm lidaktsütsü asoshi ni akok tashi inyaktsü, ta taoba hopta tetsü otsü kanga temulung shiranga ashiba mapang shia liasü.
ABC television nung Good Morning America sentong nung pai, “Asenoki inyakba ya lai nüktzü atsünger reprangzüka yoka alitsü amai ni bilemer,” ta ashi.
“La tettsü akümtsü asoshi lai ni tanur tebu kümdaktsünüa alitsü südi,” ta pai shisem.
La indang memorial tang London nung alibatemji Kensington Palace nung Diana Memorial Playground, Hyde Park nung Diana Memorial Fountain aser St James’s Palace nung Diana Memorial Walk tem lir.
Diana ya 1997 küm la den medema alisang Dodi Fayed den gari tsükoka asü.