Diane Keaton AFI Life Achievement Award angutsü

October 7, 2016 : Oscar sempet ngua alila actress Diane Keaton nem American Film Institute-i 45buba Life Achievement Award agütsütsü. Iba sentong ayongertemi film nung shilem agirtem nem agütsüba sempet rongnung ibai tuluba aser akhümket sempet lir. La nem iba sempet ya June 8 nü Los Angeles nung agütsütsü renema lir.
“Diane Keaton ya American film industry nung ajaki meima sapuba tetsür ka lir,” ta AFI Board of Trustees nung mendenbuba Howard Stringer-i ashi.
“Comedy aser drama film tem nung la shilem junga agitetbaji tangar shinga dena atishiteptsü makok. Lai agiba shilem tem nüburtemi kanga sapur. Iba den külemi lai film direct aser produce asüba ajanga lai film meimba aser la sempet tali jungkai adoka meteter,” ta pai ashi.
Lai film nung küm 50 dak tema shilem agia aruogo aser iba mapa lai Woody Allen indang “Annie Hall” film ajanga best actress sempet angu. Lai “The Godfather” aser “Looking for Mr. Goodbar” film tem nunga shilem agia lir. Ano Academy Awards nunga “Marvin’s Room,” “Reds,” aser “Something’s Gotta Give” film tem nung shilem junga agitetba ajanga best actress shimtsü atema la tenüng tenünga benoka liasü.
Lai “Play It Again, Sam,” “Sleeper,” “Manhattan Murder Mystery,” “Love and Death,” “Manhattan,” “Baby Boom” aser “Father of the Bride” comedy film tem nung kangasa junga shilem agia lir.
Pixar indang “Finding Dory” atema la ola agi shilem agi aser HBO nung “The Young Pope” otsü nung la angutsü. Keaton-i feature, documentary, music video aser television sentong tem aika direct süa lir.
44buba Life Achievement Award John Williams-i agizük aser iba jakdang Jane Fonda, Steve Martin, Mel Brooks, Shirley MacLaine, aser Morgan Freeman nungeria iba sempet agizükogo.