Dibrugarh nung Congress züngsemtemi AICC lennir chioktsü akhang

Dibrugarh, January 13 (Agencies): Hombarnü Dibrugarh District Congress Committee-i Citizenship Act anema lungkak aitba sentong tulu ka ayongzüka agi aser parnoki All India Congress Committee(AICC) lennir Dhrubajyoti Gogoi chioktsü atema takhangba agütsü.
Taoba Congress Minister Atuwa Munda-ia CAA anemertem den külemi shilem agi aser parnoki Dibrugarh nung Deputy Commissioner indang office-i ao.
Iba mapang parnoki ‘Assam Police-i mapa tamajung inyakba anendakjang, ‘Joi Aai Axom’, ‘CAA meyipa agiang’ ta yimyim ayimten.
Gogoi apuba ya tasa tamajung ka lir aser pa tatemzükba kecha melii chioktsüla, ta Congress-i tanü takhangba agütsü.
“Congress-i kanga dang meranga Citizenship Act anema noktaka arur. Onoki maneni yamaji inyaktsü aser komar ka asü nunga iba ozüng magizüktsü” ta Atuwa Munda-i ashi.
January 10, 2020 nü Duliajan nung alir AICC lennir ya special police team kati apu aser pa Guwahati tepuokdak yua lir.