Dibrugarh nung drugs seret 5.2 apu

Dibrugarh, October 16 (Agencies): Honibarnü Dibrugarh nung police-i mita aoba mapang drugs seret 5.2 apu.
Tang pua aliba drugs nung seret 2 heroin aser seret 3.2 ji brown sugar lir.
Nisung kari osang tejangja agütsüba sülen police-i Dibrugarh Amolapatty tesem nung aliba para ki ka mita bushisüngdangdang item drugs ya ngutet. Iba temesepba mozü amshir rongnung tongti nisung, Sirbek Ahmed mepushi-i jena yok.
“State nung drugs apuba rongnung ibai timba asütsü. Tia makai onoki iba temesepba mozü amshir tongti nisungbaji mepushi kechiba süra onok matong tsüngda pai pa den nisung ka anir jena oatoker liasü. Pai ano iba temsepba mozü kar tang ayoktsü atema bena aliba osang onoki jangjaogo. Onoki dang pa tsüngsü pua aputsü merangdar,” ta Dibrugarh SP Gautam Borah-i ashi.
Iba dak sendakba nung police-i ki kibur, Tajuddin Ahmed pua lir. Tajuddin Ahmed ya Krishak Mukti Sangram Samiti (KMSS), Dibrugarh unit nung Tongti Tezülur lir.
Pa den ano Arif Ali aser kidang yariteper tetsür ana asüngdangyatsü atema anir oa lir. Arif ya temesepba mozü amshir tongti nisungbar kinunger lir.
SP Gautam Borah-i, May mezüng hopta nung ‘Operation Drugs-Free Dibrugarh’ tenzüker külen tang tashi nung drugs ayoker nisung 15 puogo, ta ashi.
Parnok rongnung July 8, 2016 nü drugs ayoker tetsüti Elahi Sheikh-a pua lir. Pa ya upper aser middle Assam tesemtem nung temesepba mozü amshir aser ayoker tetsüti lir aser pai iba business ya school toktsür aliba nisung aser pai kanga temulung lemtetba nisungtem ajanga Panchali aser Kalibari tesemtem nungi inyaker.
Itanagar indang English osangkaket ‘Dawnlit Post’ nung osangbener, Rahul Verma-a brown sugar gram 30 bena lia Dibrugarh Police-i khen apu aser anogo ishika tejakdang pa aliba kidang sür lia angu.