Diesel & Petrol jenjang tasaktiba aküm

New Delhi, Rongchii (April) 20 (Agencies): India nung diesel jenjang tasaktibaji Rogonü (Hokolbar) liasü. Tanü Delhi nung diesel litre nung sen 65.31 agi ayok.
Kolkata nunga diesel litre nung sen 68.01, Mumbai nung sen 69.54 aser Chennai nung sen 68.9 agi ayok.
Ano, külen tanü küm pungu sülen petrol jenjang tasaktiba liasü. Rongjui (September) 2013 nung petrol litre nung sen 74.10 agi ayokba sülen tanü Delhi nung petrol litre nung sen 74.08 agi ayok.
Tanü Congress lennir tejen P Chidambaram-i Modi’er sorkar aitsü. “BJP-i state 22 nung parnok sorkartem kümteta lir ta asüküma jembir, saka kechiba NDA sorkari GST kübok petroleum aser petroleum products benoktsü memulunger?” ta taoba Finance Minister Chidambaram-i asüngdang.
“Tesüiba küm pezü tashi BJP sorkari totzü nungi tajangzük nguyonga arur. Totzü indang tajangzük melira BJP sorkari ketdangsüa moutettsü. Tila tanur katia iba telangzübaji meteta lir. Iba ya BJP sorkari ‘Tax the Consumer’ policy ajanga lir” ta paisa ashi.
Yaküm Aami (June) ita Indian Oil Corporation, Bharat Petroleum Corporation aser Hindustan Petroleum Corporation temi küm 15 tashi benshia aruba inyakyim melenshi. Parnoki ita shia 1 aser 16 anogotem totzü jenjang reprangshima liasü saka yaküm nung parnoki anogo shia totzü jenjang reprangshimtsü tenzük.