Diet drinks ajemba ajanga postmenopausal tetsürtem stroke südaktsütsü akok

Bushitsüngdang ka ajanga ngutetba agi, diet drinks tem ajemba ya post-menopausal tetsürtem stroke asütsü risk aliba dak sendaka lir.
Stroke ya azü jajaba tezü nokdangba ajanga ataloker aser talisa tezü tila nokdangba ajanga ataloker. Journal Stroke nung adoktsüba bushitsüngdang ajanga tetsür shirnoki diet drinks hopta nung khen mesera kodanga majemer parnok dang nungi diet drinks anogoshia ajemertem shilem 23 agi stroke asütsü ana nung lir. Iba den ano shilem 31 agi ischemic stroke aser shilem 29 agi temulungjang tashidak adoktsü ana nung aliba ngutetogo.
Iba den bendenloksema shilem 16 agi takaraba asütsü akok. Stroke asütsüba ya taoba mapang nung temulungjang tashidak mesera diabetes malirtem aser temang tozük kanga aika asüba tetsürtem anasü agi atongtsü risk lir.
“Temang tozük tangar dang nungi timba asürtemi parnok indang diet nung calories ajemdaktsütsü atema low-calorie sweetened drinks tem ajemer. Onok indang bushitsüngdang ajanga artificially-sweetened beverages dak lendong keta lir aser iba ajanga stroke aser temulungjang tashidak adokdaktsüba den sendaka aliba ngutetogo,” ta Albert Einstein College of Medicine nung Associate Professor aser bushitsüngdang lenir Yasmin Mossavar-Rahmani-i ashi.
Iba bushitsüngdang asoshi bushitsüngdangertemi post-menopausal tetsür 81,714 asadanga liasü.
“American Heart Association-i no-calorie beverage rongnung tzü ya tajungtiba ta shiogo,” ta University of Vermont nung Professor Rachel K. Johnson-i ashi.