DIG, CISF V.Khamo nem President’s Medal agütsü

Dimapur, March 14 (TYO) : March 10, 2017 nü CISF Raising Day amungdang Nagaland nungi DIG, CISF RTC Arakkonam, V Khamo nem President’s Medal for Meritorious Service agütsü.
Vitsoneinuo Khamo-i 1993 küm Civil Service Examination 1991 ajanga Central Industrial Security Force (CISF) nung aden. Naga nunger rongnung mezüng CISF nung adenba nung adenba nisungji la lir.
La tang CISF RTC Arakkonam, Tamil Nadu CISF nung Deputy Inspector General inyaker.
Mafia tem kanga bulua aliba BCCL, Dhanbad nung Khamo ya mezüngbuba tetsür CISF ketdangser lir. Lai Jharia Coal Fields nung mafia teloktem anema mapa tajung inyakba atema lai sempet agizük. Lai küm ana tashi Dhanbad nung mapa inyakdang sen crore aika alangba osettem nguteta liasü.
Khamo-i tasütait mapa inyakba atema la Inland Container Depot (ICD), Tughlakabad, Delhi nung mapa lemzüktsü aser idakjia lai takok tulu ngua mapa kanga junga inyak. Iba sülen June 2001 nung la promotion nung Patna Airport nung aser idak nungjagi Agra Airport nung lemzüktsü.
2006 küm la Vicenza, Italy nung Centre of Excellence for Stability Police units nung course ka agitsü shim. Idakji lai UN Peace Keeping atema training agütsütsü angazük.
2007-08 nung Kosovo nung UN assignment inyaktsü atema Khamo shim aser lai Civ-Pol inyak. Iba mapang lai UN Medal and Certification agizükba den US CIVPOL tanishiri la nem mapa tajung inyakba indnag kulikakettem agütsü.
La India-i meyipa aruba sülen CISF Group HQrs, Saket, New Delhi nung mapa lemzükja inyak aser idakji lai unit 11 madak ketdangsüa mapa inyak. Idak nungjagi la 5th Res.Bn, Ghaziabad nung mapa belen aser second-in-command ama inyak.
Ghaziabad nung mezüngbuba CISF indang Dog Training Centre lapokba nunga Khamo-i tongti shilem agia liasü.
Senior Commandant ka ama la CISF Group HQr., Chennai nung mapa lemzüktsü aser idakji unit 13 madak ketdangsüa inyak aser la kümsük tembangba sülen CISF DAE, Kalpakkam-i mapa belen.
2014 küm Khamo nem DG Disc & Commendation sempet agütsü aser March 2015 nung la Dy Inspector General menden nung ajungket aser RTC(A) nem mpa lemzüktsüba den addl. charge of Dy. Inspector General, CISF NLC Neyveli repsema inyakdaktsü.
February-2016 nunga V. Khamo nem DG Disc & Commendation certificate agütsü.