Digital India ataloktsü asoshi BSNL-i meranga inyaktsüla: Durga Prasad

Dimapur, July 07 (TYO): India ya digital tashi aliba linük ka akümtsü asoshi amongba Digital India Week programme dak sentakba nung nüburtem nüngdak reprangteta sorkari meyong Bharat Sanchar Nigam Limited (BSNL)-i sen dalang yong maongka aika agütsütsü.
Tanü Dimapur nung BSNL, NE-II Circle, CGM office nung osangbenertem den jembidang CGM, T Durga Prasad-i, BSNL ya mezüngbuba service agütsür lir aser June 16, 2015 nungi all India roaming call angati agütsüogo. BSNL-i linük tesem ajunga nung aonung 9:00 ako nungi anepdang 7:00 ako tashi landline nungi operator mashi ka dangi call asüba angati kümtsüogo, ta ashi.
BSNL amshirtemi BSNL portal ajanga bill agütsütettsü lenmang lapoktsüogo aser udaan portal ajanga landline tasen, broadband aser wimax connection asoshi online temepishiba agütsütettsü, ta T Durga-i ashi.
Paisa ashiba agi, tawa Kohima aser Dimapur, Signal Basti nung Next Generation Network (NGN) technology tenzüktsüogo. Iba ya ajanga mobile technology den kasa maongka aika junga angütsü. Maneni NGN ya tesem 8 nung tenzüktsü- Arunachal Pradesh nung asem, Manipur nung asem aser Nagaland nung ana. Iba dak alia BSNL-i 64 K SIMs angati agütsüba den külemi sen ajemer 128K sen 30 yong agütsür.
Sorkari nüburtem nem sorkar service balala agütsütsü meranga inyakba mapang ka nung state nung BSNL service ya mejungi lir, ta pai tesasaba olen ka ashi.
“BSNL amshir kati line aotsü asoshi aiben call asütsüsa akümer aser broadband amshirtemia connection mejungi angur mesüra khenyongi mangur. Service majungba yong BSNL amshir aikati maongka tajungba bushia nija service provider tem dangi meyiper,” ta Durga-isa metetdaktsü.
Northeast nung BSNL jenjang ajungtsü asoshi Centre-i sen crore aika intoker saka maneni BSNL service dak tamang makateter. Service tajungba mekümra maongka tasen aika agütsübaji ajanga nüjkidong mataloktsü, ta paisa metetdaktsüogo.
Durga Prasad-i ashiba ama, ali telung nung rema aliba optical fiber cable raksaba, signal waves majungba ajanga BSNL amshirtemi timtem ajurur. Service tajungtiba agüja Digital India nükjidong ataloktsü asoshi BSNL-i taliba meranga inyaktsü mapang ka tongogo.