Digital payments atema helpline number ‘14444’ tenzüktsü

New Delhi, December 11 (Agencies): Digital payments ajungkettsütsü atema TV channel ka aser website ka tenzükba sülen maneni sorkari linük tesem ajaklen toll-free helpline number ‘14444’ tenzüktsü, koba ajanga nüburtem dang shidi sen mamshii shishilembatsü atema tesayuba agütsütsü.
Iba service ya hopta ka tsüngda tenzüktsü imlar.
“Nisung aika ayimjemtsü atema sorkari Nasscom teyari meshiogo. Onoki linük tesem ajaklen helpline ka amenoktsü atema mepishia liasü aser DoT-i agütsübaji 14444 lir. Ano onoki call centre teyaria meshir. Iba maparen tenzükogo,” ta IT tentet, Nasscom Tir, R Chandrashekar-i osangbener dang metetdaktsü.
“Iba ya nüburtem first level nungi zero tashi parnok dak apet nung yaritsü atema lir. Ibaji nisung ka ket nung phone lir asü mali, Aadhaar number lir asü mali, bank account lir asü mali, item nungji ajemdaker aika reprangtsü nüngdak,” ta Chandrashekhar-isa ashi.
Digital transactions atema nüburtem nem tesayuba agutsütsü asoshi Hokolbarnü Ministry of Electronics & IT-i free-to-air channel, DigiShala sayaogo aser ibaji Doordarshan indang DTH platform nung angutsü, iba den külemi ‘Cashless India’ website ajanga nüburtem dang digital transactions indang sayutsü.
IT & Law Minister, Ravi Shankar-i ashiba agi, November 8 nü sorkari sen 500 aser 1000 notes anentsüba sülen digital payments range shilem 400 nungi 1,000 tashi kümogo.
Helpine number ji kodang tenzüktsü ? ta asüngdangba langzüdang Chandrashekhar-i, “Ibaji taruba hopta tatemlen tashi nungbo angutsü imlar,” ta ashi.