Digvijaya Singh-i Modi dangi Gadkari meranshitsü shidi zülu

Digvijaya SinghNew Delhi, January 12 (Agencies): Jammu & Kashmir nung sen crore 10,050 alangba Zojila Pass Tunnel project company ka nem agüja inyakdaktsüba atema Congress lenir Digvijaya Singh-i Mongulbarnü linük Ato Kilonser Narendra Modi dangi Road Transport Minister Nitin Gadkari merenshitsüla ta shidi ka züluogo.

Digvijaya Singh-i Hombarnü Central Vigilance Commissioner (CVC) dangia iba osang metetdakja shidi ka yokogo.

Iba contract ya IRB Infrastructure Developers Ltd. nem bendanga agütsü aser arrtsülen yanglutsü aliba Zojila pass tunnel ya Asia anüolentip tsütsü ali chipoka lenmang yangluba rongnung talangtiba asütsü.

Shidi nungji pai, “Iba maparen dak sentakba ajak kanga junga asadanger külen memunudangsa teinyaktsü tim inyaktsüla aser kanga aroka ia bushisüngdanger külen ang agütsütsü asoshi mezüng agütsüteptsü aliba sen crore 981 jia sota yua atatsüla. Ni iba tebilemtsü ya Central Vigilance Commission (CVC) danga metetdaktsüogo,” ta shia lir.

“Ni amanger nai iba tebilemtsü kanga junga asadanga ochiba agiteter Central Bureau of Investigation (CBI) nem ibai nokdangtsü tashi agütsütsü,” ta pai zülua lir.

Pai CVC dangi züluba shidi nung, “Nitin Gadkari-i IRB Group ajungkettsür, Mhaiskar nunger den lokteper inyakba ya tebilemba tajung agi inyaker masü, ta shia lir.

“Taoba mapang nunga Gadkari’er company-i sen crore aika enoka par jabaso Nikhil Gadkari IRB Group indang Ideal Energy Projects Ltd. nung shareholder aser promoter director kümdakja liasü,” ta pai zülusema lir..

You must be logged in to post a comment Login