Dilip Kumar nem Living Legend Lifetime Award agütsü

Mumbai, April 12 (Agencies): Bollywood nung nüngtugu actor Dilip Kumar nem Mongolbarnü par kidang Punjab Association ajanga ‘Living Legend Lifetime Award’ agütsüogo.
“Punjab Association nungi Ranbir Singh Chandok aser Anand nati tanü ozü kidang ni semdang. Tsüngrem kanga tajung lir. Punjab Association nungi ‘Living Legend Lifetime Award’ agütsüba kanga ajemalua agizüker,” ta arishi küm 94 tain actor indang official Twitter account nung metetdaktsü.Award agütsüba sülen noksa tangoka liasü.
Dilip kanga dang temang nung tashi mait kümogo saka noksa nung kanga lemlalemla adoka lir. Noksa nung maneni kinüngtsü Saira Banu aser sempet agütsürtem nung ketdangsertem angutsü.
Iba ita tetenzüklen Dilip Kumar temang manemi akümba osang prokshia liasü. Iba dak sendakba nung pai yamai telangzüba agütsü, “tsüngrem taochi aser nenok sarasadem ajanga ni tang tajungba lir. Tipmatem aser teperem anguba tera lir.”
Dilip Kumar aser Saira Banu nati shilem agiba film ‘Gopi’ nung ajemdaker yangluba noksa dak sendakba nung tweet tanga ka nung pai yamai zülutsü, “Asif Farooqui-i temeim kanga sayuogo. Bandra Hill Road nung wall mural tebortajung atema kanga pelar. Tsüngremi tali moajanga.”
Pa 1998 küm ‘Qila’ film nung tatembangsa shilem agia liasü. Dilip Kumar nem 1994 küm Dadasaheb Phalke Award aser 2015 küm Padma Vibhushan awar agüja liasü.
Devdas, Mughal-e-Azam aser Karma film nung shilem agiba aetma ajanga pa tali jangjaa meteter.